Read Mandinka Yuuba 7 Bible Online

Yuuba 7 - Mandinka bible

Yuuba 7

¹Fo hadamadiŋo buka dookuu koleŋo le ke duniyaa kono baŋ? A ka tara boriŋ-boriŋ kaŋ ne luŋ-wo-luŋ komeŋ tili dookuulaa.

²A la kuwo ka muluŋ ne ko joŋo meŋ be dahaa ñinoo la, komeŋ tili dookuulaa, meŋ be joobatoo la.

³Ka kari-wo-kari tambindi kenseŋ, wo le keta nte niyo ti. Suuto-wo-suuto n ka a bee tambindi bataa le kono.

⁴Niŋ ŋa n laa, n ka ñaani wuloo le koto. Bari suutoo ka jamfa m fee le, n ka tu yelemaŋ-yelemaŋo le la, fo fanoo ye ke.

⁵M baloo kono bee keta tumboo ti, aniŋ m bala fatewo kaŋ bee keta maadiŋ fatoolu ti. Niŋ ì kendeyaata doroŋ, ì ye faa fiyo la kotenke.

⁶M baluu tiloolu tambiñaa le tariyaata, ka tambi daarilaŋ walaa[3] la. Ì bee ka tambi le fo ì ye baŋ, jiki maŋ soto n na kuwo to.

⁷Alla, i hakiloo bulandi ko, nte la baluwo la sutiyaa be le ko niijiyo niŋ niiseloo teema. N te kuu betoo loŋ na kotenke.

⁸Alla, i ñaa be n na le saayiŋ, bari a te mee la, i te n je la kotenke. Niŋ i ye n na kuwo juubee, i be a tara la, nte maŋ tara keriŋ.

⁹Ko tawaloo ka janjaŋ ñaameŋ, a ye yeemaŋ, moolu fanaalu mennu ka taa fureeduu, ì buka muru naŋ kotenke wo le ñaama.

¹⁰Ì buka muru naŋ kotenke ì la buŋolu kono, sako ì bodulaalu si ì loŋ kotenke.

¹¹Wo kamma la, n te n deyi la. M be n na niikuyaa daa fo la le. N niyo toorata le, n ñanta a fo la le.

¹²Alla, muŋ ne ye a tinna i ka nte la kuwo koroosi waati-wo-waati? Nte maŋ ke ninkinankoo[4] ti, meŋ ñanta kanta la.

¹³N ka jiki, m be dahaa soto la n na laaraŋo le kaŋ, aniŋ n na foñondiŋ dulaa be ke la n ye bataa boraŋo le ti.

¹⁴Bari i ka silaŋo le naati n kaŋ, i ye kijafaroo laa n kaŋ, n ka jeri feŋolu mennu je siiboo kono.

¹⁵Ka n kankoroo dete ŋa faa, wo le be diyaa la nte ye. Ŋa faa, wo le be fisiyaa la nte ye ñiŋ dimoo ti.

¹⁶M pasita le ka tara baluwo to, hani wo nte, n te tara la baluwo to fo fawu. M bula ŋa faa. Nte la tara baluuriŋ nafaa mu muŋ ne ti?

¹⁷Muŋ ne ye a tinna hadamadiŋo kummaayaata ite ye, fo i be a la kuwo hakilitu la?

¹⁸I ka tara a la kuwo hakilituriŋ soomandaa-wo-soomandaa. I ka tara a kotobo la waati-wo-waati.

¹⁹I te i la hakilituwo bo la n kaŋ baŋ fo waati doo? I ye m bula m faŋ ma, fo n si n daajiyo kunuŋ noo.

²⁰Niŋ ŋa junube kuwo ke, ŋa muŋ kuu le ke i la, ite hadamadiŋolu Kantalaa? Muŋ ne ye a tinna, i hameta n kamma? Fo n na kuwo keta i ye kunto dunoo le ti baŋ?

²¹Muŋ ne ye a tinna i maŋ kafari ke n ye, i ye yamfa n na junube kuwolu la? A te mee la, m be tara la laariŋ kaburoo kono. I si n na kuu juubee, bari n te tara la keriŋ.