Read Mandinka Yuuba 8 Bible Online

Yuuba 8 - Mandinka bible

Yuuba 8

¹Bituŋ Bilidadi Suhankoo ye jaabiroo ke ko:

²I be i dahaa la ñiŋ kuwolu fo la waati jumaa le la? I daakumoolu keta foño baa kenseŋo ti.

³Fo Alla ka tooñaa nakari le baŋ? Waraŋ fo Alla Tallaa ka tiliŋo nakari le baŋ?

⁴Niŋ i diŋolu ye junube kuwo ke, Alla le ye ì dundi ì la junube kuwo maasiiboo kono.

⁵Niŋ i be Alla ñini la, aduŋ i be Alla Tallaa la hiinoo daani la,

⁶niŋ i seneyaata, aduŋ i tilinta, a be koyiriŋ ne ko, a be i la kuwo juubee la le, aduŋ a be i seyindi la le ko i be ñaameŋ nuŋ.

⁷I foota meŋ bee la, wo te ke la feŋ ti, niŋ i ye a niŋ feŋo laa, Alla be naa meŋ dii la i la.

⁸Ñininkaaroo ke jamaanoolu la mennu tambita, i ye a juubee, ì la moo foloolu ye muŋ ne je.

⁹Ntolu mu dindiŋolu le ti, m̀ maŋ feŋ loŋ, ǹ wuluu saŋolu maŋ mee, ì ka tambi ko niiniyo.

¹⁰Fo wo moo foloolu la kumoolu te i kawandi la baŋ, ì ye mennu fo i ye ka bo niŋ ì la fahaamuroo la?

¹¹Fo farasaañaŋo si faliŋ noo dulaa to baŋ, daameŋ maŋ ke ñamputuŋñaa ti? Fo baakintoo si baluu noo dulaa to baŋ, daameŋ maŋ ke jii dulaa ti?

¹²Niŋ jiyo jaata, itolu le foloo be noro la, janniŋ ì kaa waatoo be sii la.

¹³Moolu mennu bee ka ñina Alla la, la siniŋ saamoo ka ke teŋ ne. Moo kuruŋo niŋ jiki buka faa.

¹⁴Ì la jikoo ka muluŋ ne komeŋ boorajuloo waraŋ taaliŋ jaloo.

¹⁵Niŋ i ñajita a kaŋ, a te loo noo la, niŋ i jikita a la, a te labaŋ na.

¹⁶Moo kuruŋolu ka muluŋ ne komeŋ fiifeŋolu, mennu ye jiyo soto a ñaama, ì be bambandiŋ hani tiloo kono, ì be janjandiŋ naakoo karoo bee la.

¹⁷Ì suloolu be miniŋ-minindiŋ bere tuŋo la, ì be bambandiŋ beroolu bala.

¹⁸Bari niŋ ì naata ì wutu jee, moo te a loŋ noo la ko, ì nene ka tara nuŋ jee le.

¹⁹A juubee, moo kuruŋolu la kontaanoo daŋo bee ka ke ñiŋ ne ti. Moo doolu le ka naa finti, wolu ye ì la palaasoo taa.

²⁰Alla te balaŋ na moo to, meŋ maŋ sootaari soto, aduŋ a te kuu jawu kelaalu so la semboo la.

²¹A be i kontaanindi la le, i ye niiseewoo soto.

²²Mennu ye i koŋ, a be wolu duŋ na malu kuwo le kono, aduŋ moo kuruŋolu yaalu be kasaara la le.