Read Mandinka Jabuuroolu 102 Bible Online

Jabuuroolu 102 - Mandinka bible

Jabuuroolu 102

¹Moo la duwaa meŋ be mantooroo kono, a jikilateyiriŋo be woosii kaŋ Yaawe* ñaatiliŋo la. Hee Yaawe, n na duwaa moyi, i ye i lamoyi n na kumboo la.

²Kana i ñaa kaasi n na, n na mantooroo waatoo la. I lamoyi n na, i ye tariyaa ka n jaabi, niŋ ŋa i kumandi.

³N na baluwo be yeemaŋ kaŋ ne ko siisiyo, n kuloolu kono ka n teyi ko dimbaa.

⁴N ka munta m faŋ fee le ko ñaama jaaroo, ì ye meŋ toñonka. M buka ñaani domoroo faŋo la.

⁵N ka ŋuntaŋ baake le, fo n jaata hok.

⁶N ka munta le kiikiyaŋo meŋ be wula kaamaa kono, ko kiikiyaŋo meŋ be tumbuŋolu to.

⁷N ka fanikee n ñaa le la, n ka munta ko niŋ kunu kiideeriŋo be looriŋ buŋo turoo to.

⁸Luŋ-wo-luŋ n jawoolu ka n neŋ ne. Mennu ka n ñaawali, niŋ ì be moo doolu danka la, ì ka a ke n too le la.

⁹I la kamfaa niŋ i la jusukandoo kamma la, n ka seebuutoo le domo ko domoroo, aduŋ n na miŋ feŋo niŋ n ñaajiyo le ka ñaami. I ye n sika le ka m fayi jana.

¹¹M baluu luŋolu be baŋ na le ko wulaara dubeŋo. N ka noro le ko ñaamoo.

¹²Bari ite Yaawe, ite be tu la i la mansasiiraŋo kaŋ ne fo abadaa. Jamaanoolu te ñina la i too la horomoo la.

¹³I be wuli la le ka balafaa soto Siyoni* ye. Waatoo siita le ka i la hiinoo yitandi a la. Waatoo meŋ tombonta, a siita le.

¹⁴A tumbuŋ beroolu mu i la dookuulaalu kanufeŋo le ti, a bankumunkoo jewo ka balafaa le dundi ì la.

¹⁵Bantala banku* moolu be Yaawe too kuliyaa la le, aduŋ duniyaa mansoolu bee be a kuliyaa la a la kallankeeyaa* kaŋ ne.

¹⁶Kaatu Yaawe be Siyoni seyinkaŋ loo la le, a ye a faŋo la kallankeeyaa lankenemayandi.

¹⁷A be i lamoyi la yaantaŋolu la duwaa la le, aduŋ a te a ñaa kaasi la a la moolu la daaniroo la.

¹⁸Nte le ye a fo ko, “Ali ñiŋ kuwo safee jamaani naalaalu ye, ñiŋ kamma la moolu mennu maŋ wuluu foloo, si Yaawe jayi ko:

¹⁹Yaawe ye duuma juubee le ka bo naŋ a la taradulaa senuŋo to santo, ka bo naŋ Arijana kono, a ye duniyaa juubee duuma le.

²⁰A ye moolu ŋuntaŋ kaŋo moyi le mennu tarata mutoo kono, ka moolu firiŋ ì ye faaroo fo mennu kunna.”

²¹Wo to le moolu be Yaawe too kidimandi la Siyoni, aniŋ ka a jayi Yerusalaamu kono,

²²tuma meŋ na banku moolu aniŋ mansamarali bankoolu be kafu la ñoo ma ka Yaawe batu.

²³A ye n na fondinkeeyaa semboo bee baŋ ne, a ye m baluu tiloolu loo sutiyandi.

²⁴N kumata le ko, “Hee Alla, kana n niyo taa saayiŋ, tuma meŋ na m be n na baluwo teemoo to. Ite be tu la baluuriŋ ne fo abadaa.

²⁵Biriŋ koomanto ite le ye bankoo fondamaŋo laa, saŋ fatoolu mu i buloo la daaroo ti.

²⁶Ì be buruka la le, bari ite be tu la keriŋ ne. Ì bee le be kotoo la ko funtoo, ko duŋ feŋo, i ye ì faliŋ, ì ye yeemaŋ.

²⁷Bari ite ka tu i ñaama le doroŋ, aduŋ i maŋ dandulaa soto.

²⁸Ntolu mu i la dookuulaalu le ti, aduŋ ǹ koomalankoolu be sii la tankoo le kono. Itolu fanaa koomalankoolu be tenteŋ na le ka baluu i ñaa koto.”