Read Mandinka Jabuuroolu 103 Bible Online

Jabuuroolu 103 - Mandinka bible

Jabuuroolu 103

¹Dawuda la Jabuuroo. Nte niyo be Yaawe* jayi la le. Ka bo niŋ n sondomoo bee la, m be a too senuŋo jayi la le.

²Nte be Yaawe jayi la le de, aduŋ n te ñina la a ye kuu betoolu mennu ke.

³Ate le ka n na junuboolu bee kafari, aduŋ a ka n na kuuraŋolu bee kendeyandi.

⁴A ye n tanka kaburoo ma, aduŋ a ka tu kanu bambaloo niŋ balafaa le yitandi n na.

⁵A ka n wasandi beteyaa doroŋ ne la, ka n na fondinkeeyaa kutayandi, komeŋ niŋ duwaforoo ye i wooci.

⁶Yaawe le ka kiitiyo teyi moolu bee ye, mennu be mantooroo kono, ka ì la boloo dii ì la.

⁷A ye kuwolu lankenemayandi Musa ye le, a lafita mennu ke la, aduŋ a ye a la kaawakuu baalu yitandi Banisirayilankoolu la le.

⁸Yaawe balafaa warata le, a hiinanteeyaata. A buka kamfaa juuna, a la kanu bambaloo maŋ dandulaa soto.

⁹A buka tu a la moolu jalayi la, sako ka tu kamfaariŋ ì kamma fo abadaa.

¹⁰A buka ǹ sanka ko a ñanta ñaameŋ, hani wo a ka ǹ jarabi ǹ na junuboolu kaŋ ne, aniŋ ǹ na hakoolu.

¹¹Saŋ fatoolu be warariŋ santo bankoo kunto ñaameŋ, a la kanu bambaloo be warariŋ moolu ye wo le ñaama, mennu ye a kuliyaa.

¹²Tilibo niŋ tilijii be jamfariŋ ñoo la ñaameŋ a ye ǹ na junuboolu jamfandi ǹ na wo le ñaama.

¹³Wuluufaa konotoo ka diyaa a diŋolu fee ñaameŋ, Yaawe konotoo ka diyaa moolu fee wo le ñaama, mennu ye a kuliyaa.

¹⁴A ye a loŋ ne ǹ daata ñaameŋ, a ye a loŋ ne ko ntolu mu bankumunkoo le ti.

¹⁵Hadamadiŋo la baluwo ka munta le ko ñaamoo. A ka soroŋ ne komeŋ wulakono firoo,

¹⁶niŋ foñoo ye a fee, a ye taa, aduŋ moo te a noo je la fereŋ.

¹⁷Bari Yaawe la kanu bambaloo ka tu moolu ye le, mennu ye a kuliyaa, fo abadaa. A ka tu beteyaariŋ jamaani-wo-jamaani moolu fee le,

¹⁸mennu ye a la kambeŋo muta, ì ka tu tilindiŋ a la yaamaroolu kaŋ.

¹⁹Yaawe ye a la mansasiiraŋo londi Arijana kono le, aduŋ ate le mu daafeŋolu bee la Mansa ti.

²⁰Alitolu malaayika sembemaa baalu, mennu ka i lamoyi a la kumoo la, ka a la yaamaroolu bee taamandi, ali Yaawe jayi.

²¹Alitolu alihawaa kono sembemaalu, a la dookuulaalu, mennu ka a la lafoo ke, ali Yaawe jayi.

²²Yaawe la daafeŋolu bee si a jayi daa-wo-daa, a la mansabaayaa kono. Nte niyo be Yaawe jayi la le.