Read Mandinka Jabuuroolu 104 Bible Online

Jabuuroolu 104 - Mandinka bible

Jabuuroolu 104

¹Nte niyo be Yaawe* jayi la le. Hee Yaawe n na Alla, ite warata baake le. I ye horomoo niŋ waroo duŋ ne ko dendikoo.

²I ye i faŋ murubeŋ niŋ mala baa le la. Ite le ye saŋ fatoolu wanka ko tiriliisoo*.

³I ye i la sabatidulaa loo jiyolu le kaŋ, mennu be saŋ fatoolu ye santo la. I ka tawaloolu le ke i la keleraŋ sareetoolu* ti, aduŋ i la taamaraŋo mu foñoo le ti, i ka tii a fee ko kunoo niŋ a dampaŋo.

⁴I ka foñoo le ke i la kiilaa ti, dimbaa ye ke i la dookuulaa ti.

⁵I ye bankoo londi a fondamaŋolu kaŋ ne, aduŋ a te wutu la a noo to muk.

⁶I ye fankaasoo feenee a kaŋ ne, ko muurilaŋo, jiyo ye konkoolu kunuŋ.

⁷I naata kuma jiyo ye, a borita. Biriŋ i bumbunta a kaŋ, a kidita ka taa.

⁸A woyita ka bo konkoolu kaŋ, ka taa wulumbaŋolu kono, a taata, i ye dulaa ke a ye daameŋ to.

⁹I ye naanewo dadaa, a te tambi la a la, ñiŋ kamma la a te bankoo muuri la kotenke.

¹⁰I ka a saabu le woyoolu ka jiyo jurumi wulumbaŋolu kono, ka bori konkoolu teema.

¹¹Ì keta wulakono daafeŋolu bee mindulaa ti. Wulakono faloolu ka i miŋ jee le.

¹²Kunoolu ka daakaa ì dandaŋolu la le, ì ka tara denkili laa la yiribuloolu santo.

¹³I ka samaajiyo jindi konkoolu kaŋ ne ka bo i sabatidulaa to saŋo santo, ka duniyaa fandi i la neemafeŋolu la.

¹⁴Ite le ka ñaamoo falindi beeyaŋolu ye, aniŋ fiifeŋolu, hadamadiŋolu ye, ñiŋ kamma la ì si domoroo soto ka bo bankoo to:

¹⁵Wayinoo* ka soto jee le, ka hadamadiŋo jusulandi, ka taa olifu* tuloo, ka a ñaadaa malamalandi, aniŋ mbuuroo, ka semboo dii a la.

¹⁶Libanooni sedari* yiroolu ka jiyo soto le kendeke, Yaawe faŋo la yiroolu le mu, a ye mennu falindi.

¹⁷Kunoolu ka ì la ñaŋolu ke ì santo le, jimoolu ka ì la ñaŋolu ke junipa yiroolu santo.

¹⁸Konkotoŋolu yaa be konko jaŋolu le santo, konkokono saŋolu maabodulaa be konko huwolu kono.

¹⁹Ite le ye karoo daa ka ke taamanseeri ti waati looriŋolu la, aduŋ tiloo ye a boyi waatoo loŋ ne.

²⁰Ite le ye diboo daa, ka a ke suutoo ti. Suutoo la, wulakono daafeŋolu ka yaayi taariŋ.

²¹Jatoolu ka bumbuŋ ì la deema suboolu kamma le, ka tara i yillaariŋ domoroo ma, Alla ka meŋ dii.

²²Niŋ tiloo bota, ì si muru, ì ye i laa ì la koloolu kono.

²³Moolu fanaa ka finti le ì ye taa ì la dookuwo la, ì ye tara a kaŋ fo wulaaroo.

²⁴Kooni Yaawe, i ye meŋ daa a siyaata le. I ye ì bee daa i la ñaameŋo le kono. Duniyaa be faariŋ i la daafeŋolu le la.

²⁵Fankaasoo hayinaŋ, a warata, a fanuta, a be faariŋ daafeŋolu la, ì maŋ yaatee soto, niilamaa feŋolu, domandiŋ, waramaa.

²⁶Kuluŋolu ka bori a kono le, aduŋ daafeŋ Lefiyatani[33] ka yandaa a kono le, i ye meŋ daa.

²⁷Ñinnu bee jikoo be looriŋ ite le kaŋ, ka domoroo dii ì la a waatoo la.

²⁸I ka a dii ì la le, ì ye a taa ka a domo. I ka i buloo tiliŋ ì la le, ì ye wasa.

²⁹Niŋ i ye i ñaa kaasi ì la, ì ka jikilateyi le. Niŋ i ye i la baluwo niijii foñoo taa, ì ka faa le, ì ye muru ka ke bankumunkoo ti.

³⁰Niŋ i ye i la baluwo niijii foñoo dii ka ì daa, baluu kutoo ka soto kotenke.

³¹Allamaa Yaawe la kallankeeyaa* ye tu fo abadaa. Allamaa Yaawe ye tu seewooriŋ a la daaroo to.

³²Niŋ a ye bankoo juubee, bankoo ka jarajara le. Niŋ a ye konkoolu maa, ì ka siisii le.

³³M be suukuwo laa la Yaawe ye le n na baluwo bee kono. Niŋ m be n niyo la, m be suukuwo laa la le ka n na Alla jayi.

³⁴Allamaa n na miiroo ye Yaawe kontaani, kaatu a la kuwo le ka n seewondi.

³⁵Allamaa junubelaalu ye buruka duniyaa kono. Allamaa moo kuruŋolu yeemaŋ na fo fawu. Nte niyo be Yaawe jayi la le. Ali Yaawe jayi.[34]