Read Mandinka Jabuuroolu 106 Bible Online

Jabuuroolu 106 - Mandinka bible

Jabuuroolu 106

¹Ali Yaawe* jayi.[39] Ali Yaawe tentu, kaatu a beteyaata le, a la kanu bambaloo be tu la le fo abadaa.

²Jumaa le si kuwolu bee fo noo Yaawe ye mennu ke, waraŋ ka a jayi noo timmarinke?

³Seewoo be moolu le ye mennu ka a la luwaa kanta, aniŋ mennu ka tu taama la tiliŋo la.

⁴Hee Yaawe, i hakiloo ye bula n na niŋ i be konotodiyaa yitandi la i la moolu la. I la deemaaroo futandi m ma niŋ i be ì tankandi la.

⁵N jerindi i la tomboŋ moolu la yiriwaa la fo n niŋ ì si seewoo ñoo la, aniŋ ka ŋaañaa i la moolu fee, i fansuŋ moolu.

⁶Ntolu ye junuboo ke le komeŋ ǹ na alifaa foloolu, ŋà kuu kuruŋolu le ke, ŋà kuu jawoolu le ke.

⁷Tuma meŋ m̀ mumuñolu be Misira, ì maŋ ì hakilitu kaawakuwolu to Alla Tallaa ye mennu ke. A ye kanu bambaloo meŋ yitandi ì la, a fuumata le, bari ì ñinata wo la le, aduŋ ì balanta a ma Kulunjumbe Baa to.

⁸Hani wo, a ye ì kiisa le a too kamma la, ñiŋ kamma la moolu si a semboo la waroo loŋ.

⁹A la yaamaroo kaŋ, Kulunjumbe Baa jaata, bituŋ a ye ì tambindi baa teema la banku jaaroo kaŋ.

¹⁰A ye ì kiisa ì konnantewolu bulu le, a ye ì tankandi ì jawoolu ma.

¹¹Jiyo ye ì jawu kumbaalu kunuŋ ne, hani kiliŋ maŋ bo.

¹²Bituŋ a la moolu naata laa a la laahidoolu la, aduŋ ì ye suukuwo laa ka a jayi.

¹³Bari ì tariyaata ñina la le a ye kuwolu mennu ke, aduŋ ì maŋ a la yaamaroo batu.

¹⁴Ì tuta domori meeyaa bambaloo le yitandi la keñewuloo* kono, aduŋ ì ye Alla kotobo jee le.

¹⁵Ì ye meŋ kaniŋ a ye a dii ì la le, bari a ye jankari jawoo jindi ì kaŋ ne.

¹⁶Tuma meŋ ì be daakaariŋ keñewuloo kono, kewo doolu ye Musa kiiliyaa le, aniŋ Haaruna, Yaawe la moo senuŋo.

¹⁷Bituŋ bankoo yeleta Datani fee, a ye a kunuŋ, a saarenta Abiramu fee, aniŋ a la kafoo moolu.

¹⁸Alla ye dimbaa jindi ì la kafoo moolu kaŋ ne, ka wo moo kuruŋolu bee jani.

¹⁹Ì naata ninsituuraariŋo le dadaa sanoo la Sinayi Konkoo to,[40] ì ye a batu jalaŋo ti.

²⁰Ì ye Alla niŋ a la kallankeeyaa* tu jee, ì ka ninsituuraa dadaariŋo batu, ninsoo meŋ ka ñaamoo ñimi.

²¹Ì ñinata Alla la le, ì la kiisandirilaa, meŋ ye kuu baalu ke Misira,

²²kaawakuwolu a ye wolu le ke jee,[41] aduŋ a ye kijafara kuwolu le ke Kulunjumbe Baa to.

²³Bituŋ a naata a fo a be ì kasaara la, bari a la tomboŋ moo Musa le loota a niŋ ì teema, ka a daani, a kana a la kamfaa jindi ì kaŋ ka ì kasaara.

²⁴Wo koolaa ì balanta taa la banku kendoo kaŋ ne, kaatu ì maŋ laa Alla la laahidoo la.

²⁵Ì tarata ŋunuŋunu la ì la tiriliisoolu* kono le, aduŋ ì maŋ Yaawe la kumoo muta.

²⁶Bituŋ a ye a buloo wulindi ka kali ì ye ko, a be a tinna le ì ye faa keñewuloo kono,

²⁷aduŋ a be ì koomalankoolu janjandi la bantala bankoolu* kaŋ ne, ka ì bula ì ye faa bankoolu kaŋ taariŋ.

²⁸Bituŋ m̀ mumuñolu naata duŋ Baali* jalambatoo to Pewori Konkoo to, ì ka sadaalu* domo ì ye mennu bondi furewolu ye.

²⁹Ì ye Yaawe la kamfaa wulindi le ka bo niŋ ì kekuwolu la, bituŋ alibalaa kuuraŋo boyita ì kaŋ.

³⁰Wo le to Pineha wulita ka a kuwo daa faa, bituŋ alibalaa kuuraŋo naata loo.

³¹Wo ye a tinna le a keta moolu ñaa koto moo tilindiŋo ti, hani ka taa fo fawu.

³²Ì ye Yaawe kamfandi Meriba Woyoolu to le, aduŋ ì la kuwo ye Musa dundi bataa kono.

³³Ì ye a niyo kuyandi le, aduŋ a ye kumoolu le fo mennu kasiyaata.

³⁴Ì maŋ banku moolu kasaara ko Yaawe ye ì yaamari ñaameŋ.

³⁵Ì niŋ banku moolu kafuta le ka musoolu ñini ì kono, aduŋ ì ye i bula ì fee ì la maañaa jawoolu to le.

³⁶Ì ka wolu la jalaŋolu batu le, aduŋ wo le naata ke ì ye kutindiŋo ti.

³⁷Ì ka ì dinkewolu niŋ ì dimmusoolu faa sadaa ti wo jalaŋolu[42] ye le.

³⁸Ì ka ì faŋolu dinkewolu niŋ ì dimmusoolu faa, mennu maŋ kuu ke, ka ì bondi sadaa ti Kanaani jalaŋolu ye, aduŋ wolu yeloo ye a tinna le bankoo kosota.

³⁹Ì ye ì faŋolu kosondi ì la maañaalu to le, aduŋ ì ka maa le komeŋ cakoolu.[43]

⁴⁰Bituŋ Yaawe kamfaabaata a la moolu kamma, aduŋ a ñewunta ì la le, itolu mennu mu a la tomboŋ moolu ti.

⁴¹A ye ì duŋ banku koteŋ moolu bulu, aduŋ mennu ye ì koŋ, wolu le ye ì mara.

⁴²Ì jawoolu ye ì mantoora le, aduŋ ì tarata wo marali jawoo le koto.

⁴³A ye ì kiisa le siiñaa jamaa, bari ì tuta balaŋo le la ì la tawunteeyaa kono. Ì bulata kasaaroo kono ì la junuboolu kamma la.

⁴⁴Wo ñaa-wo-ñaa, biriŋ a ye ì moyi kumboo la, a ye ì la mantooroo loŋ ì ye le.

⁴⁵Ì la kuwo kamma la a ye i miira a la kambeŋo la le a niŋ ì teema, aduŋ a sabarita le, a la kanu bambaloo la waroo kamma la.

⁴⁶Ate le ye a tinna ì mutalaalu bee ye balafaa soto ì ye.

⁴⁷Hee Yaawe ǹ na Alla, m̀ bondi mutoo kono, ǹ seyindi ka bo banku koteŋolu kaŋ, fo ǹ si i tentu i too la kuliyaa kaŋ, aduŋ ǹ si jusulaa ka i jayi.

⁴⁸Tenturoo be Yaawe ye, Banisirayilankoolu la Alla, ka bo saayiŋ na ka taa fo abadaa. Moolu bee ye a fo ko, “Amiin.” Ali Yaawe jayi.