Read Mandinka Jabuuroolu 115 Bible Online

Jabuuroolu 115 - Mandinka bible

Jabuuroolu 115

¹Yaawe*, ite le too ñanta kuliyaa la, a maŋ ke ntolu ti, i la kanu bambaloo niŋ i la tiliŋo kamma la.

²Muŋ ne ye a tinna sii koteŋolu ka ǹ ñininkaa ko, “Ali la Alla duŋ, a lee?”

³Ǹ na Alla be Arijana kono le, meŋ diyaata a ye, a ka wo le ke.

⁴Moolu ye mennu dadaa ì buloolu la sanoo niŋ kodiforoo, itolu ye wo le ke ì la Alla ti.

⁵Daalu be ì la, bari ì buka diyaamu noo, ñaalu be ì la, bari ì buka i je.

⁶Tuloolu be ì la, bari ì buka i moyi noo, nuŋolu be ì la, bari ì buka seera taa.

⁷Buloolu be ì la, bari ì buka feŋ maa noo ì la, siŋolu be ì la, bari ì buka taama. Ì buka kuma bondi ì kaŋolu kono.

⁸Mennu ye ì dadaa, ì fanaa si ke wo ñaama, aniŋ mennu bee laata ì la.

⁹Alitolu Banisirayilankoolu, ali ali jikoo sembe Yaawe la. Ate le mu ali maakoyi baa ti, aniŋ ali la tankaraŋ koteeroo*.

¹⁰Alitolu Haaruna koomalankoolu,[47] ali ali jikoo sembe Yaawe la. Ate le mu ali maakoyi baa ti, aniŋ ali la tankaraŋ koteeroo.

¹¹Alitolu mennu ye Yaawe kuliyaa, ali ali jikoo sembe a la. Ate le mu ali maakoyi baa ti, aniŋ ali la tankaraŋ koteeroo.

¹²Yaawe hakiloo ka tu ǹ kaŋ ne, aduŋ a be neema la m̀ ma le, a be neema la Banisirayilankoolu ma le, aniŋ Haaruna koomalankoolu bee.

¹³A be neema la moolu ma le mennu ye a kuliyaa, moondiŋ, moo baa.

¹⁴Allamaa Yaawe ye ali jiidindi, ali niŋ ali koomalankoolu.

¹⁵Allamaa Yaawe ye neema ali ma, meŋ ye saŋo niŋ bankoo daa.

¹⁶Yaawe le taa mu Arijana ti, aduŋ bankoo, a ye wo karafa hadamadiŋolu le ma.

¹⁷Furewolu buka Yaawe jayi noo, mennu be deyiriŋ tek saayaa kono.

¹⁸Bari ntolu be Yaawe tentu la le, ka bo saayiŋ na, ka taa fo abadaa. Ali Yaawe jayi.[48]