Read Mandinka Jabuuroolu 118 Bible Online

Jabuuroolu 118 - Mandinka bible

Jabuuroolu 118

¹Ali Yaawe* tentu, kaatu a beteyaata le, a la kanu bambaloo be tu la le fo abadaa.

²Banisirayilankoolu, ali a fo ko, “A la kanu bambaloo be tu la le fo abadaa.”

³Haaruna koomalankoolu, ali a fo ko, “A la kanu bambaloo be tu la le fo abadaa.”

⁴Moolu mennu bee ye Yaawe kuliyaa, ali a fo ko, “A la kanu bambaloo be tu la le fo abadaa.”

⁵Biriŋ m be deteriŋ, ŋa Yaawe kumandi le, a ye n jaabi, aduŋ a ye m firiŋ.

⁶N te sila la, bayiri Yaawe be m fee le, hadamadiŋolu si muŋ ne noo m ma?

⁷Yaawe be m fee le ka m maakoyi, aduŋ n ñaa be n jawoolu la boyoo je la le.

⁸Ka tankoo ñini Yaawe bulu, wo le fisiyaata ka i jikoo loo hadamadiŋo kaŋ.

⁹Ka tankoo ñini Yaawe bulu, wo le fisiyaata ka i jikoo loo maralilaalu kaŋ.

¹⁰N jawu banku jamaa le ye m murubeŋ, bari ŋa ì noo le ka bo niŋ Yaawe semboo la.

¹¹Ì ye m murubeŋ ne, ì ye n suki, bari ŋa ì noo le ka bo niŋ Yaawe semboo la.

¹²Ì kuruta n na le komeŋ kumoolu, bari ì dimbaa tariyaata dubeŋ na le komeŋ ñansaraŋo. Ŋa ì noo le ka bo niŋ Yaawe semboo la.

¹³A kandita n kaŋ baake le, fo domandiŋ n si tu, bari Yaawe ye m maakoyi le.

¹⁴N semboo ka bo Yaawe le bulu, n ka suukuwo laa a ye le, kaatu ate le ye n kiisa.

¹⁵Ali seewoo niŋ maakaŋo moyi kuma la Alla la moolu la daakaalu to, kaatu ì ye nooroo ke keloo to le, ì ko: “Yaawe semboo warata le, aduŋ ate le ka nooroo ke.

¹⁶A bulubaa buloo le ye nooroo saabu m̀ ma, Yaawe semboo warata le.”

¹⁷M maŋ taa faa la, fo n si baluu ka a seyinkaŋ Yaawe ye meŋ ke.

¹⁸Yaawe ye n kuluu jawuke le, bari a maŋ m bula ŋa faa.

¹⁹Ali dundaŋ daa yele n ye,[51] moo tilindiŋolu si duŋ daameŋ, fo n si duŋ konoto ka jayiroo dii Yaawe la.

²⁰Ñiŋ mu Yaawe la dundaŋ daa le ti, moo tilindiŋolu doroŋ ne si duŋ noo a la.

²¹Maariyo, ŋa i tentu le, kaatu i ye n na duwaa jaabi le, aduŋ ite le ye n kiisa.

²²Beroo meŋ buŋ loolaalu jututa a la, wo le naata ke tonkonna bere kummaa ti.

²³Yaawe le ye ñiŋ ke, aduŋ a kaawakuuyaata ǹ ñaa koto le.

²⁴Yaawe ye ñiŋ luŋo ke juurataa le ti, ali ŋà a jayi, ŋà seewoo.

²⁵Yaawe, ŋà i daani le fo i si ǹ tanka, dukaree Yaawe, ñaatotaa dii ǹ na.

²⁶Allamaa neema ke la a ye, ate meŋ ka naa Yaawe too la. M̀ be duwaa la ali ye neemoo la ka bo Yaawe Batudulaa Buŋo* kono.

²⁷Yaawe le mu Alla ti, a ye ǹ na baluwo malandi le. Ali yiribulu jambamaalu cafu ka juuraloo dati. Ali niŋ doŋo ye taa sadaajanidulaa* to.

²⁸Ite le mu n na Alla ti, m be i tentu la le. Ite le mu n na Alla ti, m be i la waroo fo la le.

²⁹Ali Yaawe tentu, kaatu a beteyaata le, a la kanu bambaloo be tu la le fo abadaa.