Read Mandinka Jabuuroolu 119 Bible Online

Jabuuroolu 119 - Mandinka bible

Jabuuroolu 119

¹[52] Alef Barakoo be moolu le ye, mennu taaraŋ siloo maŋ sootaaroo soto, mennu ye ì la baluwo loo Yaawe* la yaamaroo kaŋ.

²Barakoo be moolu le ye, mennu ka a la kumakaŋolu muta, mennu ka ate ñini niŋ ì sondomoo bee la,

³mennu buka kuu jawu ke, bari ì ka taama a la siloo le la.

⁴Maariyo, i ye i la luwaalu dii le, ñiŋ kamma ǹ si ì muta niŋ soobeeyaa la.

⁵Nte hamoo mu ñiŋ ne ti, ka i la luwaalu muta, a ye bambaŋ.

⁶Niŋ ŋa n lamoyi i la yaamaroolu bee la, wo to n te bula la maloo kono.

⁷Niŋ ŋa i la luwaa tilindiŋolu karaŋ, m be i tentu la niŋ sondome senuŋo le la.

⁸M be i la luwaalu muta la le, kana i koo dii n na fereŋ. Bet

⁹Fondinkewo si a la baluwo taamandi noo seneyaa kono ñaadii le? A si a ke noo le, niŋ a ye Yaawe la kumoo muta.

¹⁰Nte ka i ñini niŋ n sondomoo bee le la, kana m bula ŋa jenke i la yaamaroolu la.

¹¹Ŋa i la kumoolu muta n sondomoo kono le, ñiŋ kamma la n kana junube kuu ke i la.

¹²Tentoo be ite Yaawe ye. N karandi i la luwaalu la.

¹³M be i la luwaalu bee kiliŋ-kiliŋ seyinkaŋ na le, i ye mennu dii i la moolu la.

¹⁴N ka seewoo i la yaamaroolu mutoo la le, ka tambi naafulu baa sotoo la.

¹⁵N ka m miira i la luwaalu la le, aduŋ n ñaa ka tu looriŋ i la siloolu kaŋ ne.

¹⁶N ka seewoo i la kumakaŋolu la le, n te ñina la i la kumoolu la. Kimel

¹⁷Yaawe, beteyaa nte fee, i la dookuulaa, fo n si baluu ka i la kumoo muta.

¹⁸N ñaalu yelendi, fo n si kaawakuu tooñaalu je i la karandiroo kono.

¹⁹Nte mu luntaŋ tambilaa le ti duniyaa jaŋ. Kana i la yaamaroolu maabo m ma.

²⁰N niyo ka tara ñaaniriŋ i la yaamaroo la le waati-wo-waati.

²¹I ka faŋ waralaalu niŋ danka moolu jalayi le, mennu ka jenke i la yaamaroolu ye.

²²Ì la nendiroolu niŋ jutunnayaa bo n kaŋ, kaatu nte ye i la luwaalu muta le.

²³Hani maralilaalu si sii ka feeroo siti n kamma, nte be i la luwaalu karaŋ na le.

²⁴I la karandiroolu le ka n seewondi, wolu le mu n na yaamarilaalu ti. Dalet

²⁵M be laariŋ buutoo le kono, n nii koririŋo. M bambandi kuu ka bo niŋ i la laahidoo la.

²⁶Kabiriŋ ŋa a bee dantee meŋ keta n na, i ye n jaabi le. N karandi i la luwaalu la.

²⁷M maakoyi ka i la yaamaroolu taamandiñaa fahaamu, m be kali m miira la i la kaawakuwolu la le.

²⁸Niikuyaa ye a tinna le jiyo faata n kono, m bambandi ka bo niŋ i la kumoo la.

²⁹N jamfandi sila jenkeriŋolu la, i ye hiinanteeyaa m fee ka n karandi i la luwaa la.

³⁰Ŋa meŋ tomboŋ, wo le mu ka i la siloo nooma foroyaa kono. N ka n hakilitu i la yaamaroolu to le.

³¹Hee Yaawe, nte ka daakaa i la kumoo le kaŋ, kana soŋ ŋa bula maloo kono.

³²M be soobeeyaa la i la yaamaroolu mutoo la le, kaatu i be n hakiloo fanundi la le. Hee

³³Yaawe, n karandi ka i la luwaalu mutañaa loŋ, m be ì nooma la le fo labandulaa to.

³⁴M maakoyi ka i la karandiroo fahaamu kendeke, fo n si a muta noo, aniŋ ka a taamandi niŋ n sondomoo bee la.

³⁵N kenkeŋ ka taama i la yaamaroolu la, kaatu n ka seewoo ì la le.

³⁶N sondomoo tilindi i la luwaa mutoo kaŋ, wo ye tambi n ye naafulu sotoo la.

³⁷N ñaa bondi looriŋ kuu kenseŋolu kaŋ, i ye n niyo tanka ka bo niŋ i la kumoo la.

³⁸I la laahidoo timmandi nte i la dookuulaa ye, i ye meŋ landi moolu ye mennu ye i kuliyaa.

³⁹Maloo bo n kaŋ n silata meŋ na, bayiri i la kiitiiteyoolu tilinta le.

⁴⁰A fele, nte hameta le ka i la luwaalu muta. Baluu kutoo dii n na i la tiliŋo kaŋ. Wawu

⁴¹Yaawe, i la kanu bambaloo yitandi n na, i ye n kiisa ka bo niŋ i la laahidoo la.

⁴²Wo le to n si moolu jaabi noo mennu ka n neŋ, kaatu n laata i la kumoolu la le.

⁴³Kana soŋ n daa kenseŋo ye loo, fo n si tooñaa kumoolu fo, kaatu ŋa jikoo soto i la kiitiiteyoolu to le.

⁴⁴M be tu la i la kumakaŋo muta la le, fo janniŋ fawu.

⁴⁵M be tara la baluuriŋ firiŋo le kono, kaatu ŋa a kata le ka i la luwaalu muta.

⁴⁶M be i la dandalaaroolu fo la hani mansoolu ñaatiliŋo la le, aduŋ n te bula la maloo kono.

⁴⁷N ka seewoo i la yaamaroolu la le, kaatu ŋa ì kanu le.

⁴⁸Ŋa i la kumakaŋolu kanu le, ŋa ì kuliyaa le fanaa, aduŋ m be kali m miira la i la karandiroolu la le. Sayin

⁴⁹I miira i la laahidoo la, i ye meŋ dii nte la, i la dookuulaa, meŋ ye a tinna ŋa jikoo soto.

⁵⁰N ka sabari n na mantooroolu kono le, kaatu i la laahidoo le ye m maakoyi ka tara baluuriŋ.

⁵¹Faŋ waralaalu ka n ñaawali baake le, bari m maŋ n koo dii i la yaamaroo la.

⁵²Hee Yaawe, i ye kiitiiteyoolu mennu ke kabiriŋ, niŋ ŋa m miira ì la, wo ka n sabarindi le.

⁵³N jusoo ka kandi baake le, niŋ ŋa moo kuruŋolu je, mennu ye ì koo dii i la yaamaroo mutoo la.

⁵⁴I la kumakaŋolu le mu n daa kono suukuwo ti, n na duniyaa baluwo muumewo to.

⁵⁵Hee Yaawe, n hakiloo ka tara i kaŋ ne suutoo, n ka i la yaamaroo kanta le.

⁵⁶Ñiŋ ne mu n kunto dunoo ti, ka i la luwaalu muta. Het

⁵⁷Ite Yaawe le keta nte taa ti, ŋa laahidoo taa le ka i la kumoolu muta.

⁵⁸Ŋa i daani niŋ n sondomoo bee le la, ka hiinanteeyaa m fee ka bo niŋ i la laahidoo la.

⁵⁹Kabiriŋ ŋa m miira m baluuñaa la, n yelemata le ka bula i la karandiroolu nooma.

⁶⁰Ŋa m bambaŋ ne, aduŋ m maŋ tonkutonku fereŋ, ka i la yaamaroolu muta.

⁶¹Moo kuruŋolu ye ì la wereŋolu laa n kamma ñaa-wo-ñaa, nte maŋ ñina i la yaamaroo la.

⁶²Suutoo teema, n ka wuli le ka i jayi, i la kiitiiteyi tilindiŋolu kamma la.

⁶³Nte mu moolu bee le kafuñoo ti, mennu ye i kuliyaa, mennu ka i la luwaalu muta.

⁶⁴Hee Yaawe, i la kanu bambaloo ye duniyaa bee le beŋ, n karandi i la luwaalu la. Tet

⁶⁵Hee Yaawe, i ye beteyaa le yitandi nte la, i la dookuulaa, ka bo niŋ i la laahidoo la.

⁶⁶N ñaalabulandi ka londoo niŋ fahaamuroo soto, kaatu n laata i la yaamaroolu la le.

⁶⁷Janniŋ jaraboo be laa la n kaŋ, a ye a tara le n jenketa, bari saayiŋ n ka i la kumoo muta le.

⁶⁸Ite beteyaata le, i ka kuu betoo doroŋ ne ke. N karandi i la luwaalu la.

⁶⁹Faŋ waralaalu ye faniyaa le fo ka n too tiñaa, bari ŋa ite la kumakaŋolu muta niŋ n sondomoo bee le la.

⁷⁰Itolu sondomoolu sukita le, bari i la karandiroo ka nte seewondi le.

⁷¹Jaraboo meŋ laata n kaŋ, a beteyaata n to le, kaatu a ye n karandi i la luwaalu la le.

⁷²Ite ye yaamaroo meŋ dii, wo le fisiyaata nte ye duniyaa sanoo niŋ kodiforoo ti. Yod

⁷³Ite le mu n Daamansoo ti, ite le ye muluŋo ke n na. Fahaamuroo dii n na fo n si i la luwaalu karaŋ noo.

⁷⁴Moolu mennu ye i kuliyaa, niŋ ì ye n je, ì be seewoo la le, kaatu ŋa jikoo soto i la laahidoolu to le.

⁷⁵Hee Yaawe, ŋa a loŋ ne ko, i la kiitiiteyoolu tilinta le, i ye n jarabi le, kaatu i tilinta le.

⁷⁶I la kanu bambaloo yitandi n na ka n sabarindi, ka bo niŋ i la laahidoo la, i ye meŋ dii nte la, i la dookuulaa.

⁷⁷Balafaa soto n ye, fo n si baluu, kaatu i la karandiroo ka n seewondi le.

⁷⁸Allamaa faŋ waralaalu ye bula maloo kono, kaatu ì ye faniyaa kumoolu le fo m ma ka n tiñaa. Nte de, m be kali m miira la i la yaamaroolu la le.

⁷⁹Moolu kafundi m ma, mennu ye i kuliyaa, mennu ye i la karandiroolu fahaamu.

⁸⁰Allamaa n sondomoo kana sootaari soto, ka bula i la luwaalu nooma, ñiŋ kamma la n kana bula maloo kono. Kaf

⁸¹N ñaanita i la kiisandiroo la le fo n korita. Ŋa n jikoo loo i la kumoo le kaŋ.

⁸²N korita i la laahidoo kotofeloo la le. Ŋa ñininkaaroo ke le ko, muŋ tuma le i be n jusoo ñabu la?

⁸³M fasata le komeŋ niŋ sufura bootoo meeta siisiyo kono, hani wo m maŋ ñina i la luwaalu la.

⁸⁴Janniŋ muŋ tuma le m be tara la muñariŋ? Muŋ tuma le i be moolu kiitindi la mennu ka m mantoora?

⁸⁵Faŋ wara moolu ye jamfaa dinkoo le siŋ n kamma, moolu mennu buka taama i la yaamaroo la.

⁸⁶I la yaamaroolu bee mu lanna kuwo le ti. Bari wo moolu ka nte mantoora le, daliila te a la. M maakoyi!

⁸⁷Domandiŋ ì si m bondi duniyaa kono, bari nte maŋ n ñaa kaasi i la luwaalu la.

⁸⁸N niyo tankandi ka bo niŋ i la kanu bambaloo la, ñiŋ kamma la n si luwaa muta i ye meŋ dii. Lamed

⁸⁹Yaawe, i la kumoo le be loo la fo abadaa, a be timmariŋ Arijana kono le.

⁹⁰Ite be tu la tilindiŋ ne fo fawu. Ite le ye duniyaa londi, aduŋ a te wutu la a noo to.

⁹¹Feŋo bee be looriŋ i la kaŋo le kaŋ, ka naa bula bii la, kaatu ì bee be i la maroo le to.

⁹²Niŋ a ye a tara i la yaamaroo le buka n seewondi nuŋ, tennuŋ m be faa la n na mantooroolu kono le.

⁹³Nte te ñina la i la luwaalu la muk, kaatu i ye n niyo tankandi ka bo niŋ wolu le la.

⁹⁴Ite le taa mu n ti, wo to n tankandi, kaatu n hameta le ka i la luwaalu muta.

⁹⁵Moo kuruŋolu ka tara hameriŋ ne ka m faa, bari nte ka tara m miira la i la luwaa le la.

⁹⁶Ŋa a je le ko, feŋo bee ye dandulaa soto le, bari i la yaamaroo, dandulaa te wo la. Mem

⁹⁷Nte ŋa i la karandiroo kanu le famfaŋ, aduŋ n ka m miira a la le luŋ-wo-luŋ.

⁹⁸I la yaamaroo le ka n ñaamendi ka tambi n jawoolu la, kaatu a ka tara n kono le waati-wo-waati.

⁹⁹Ŋa fahaamuroo ke le ka tambi n karammoolu bee la, kaatu n ka n hakiloo loo i la karandiroolu le kaŋ.

¹⁰⁰N ka fahaamuroo ke le ka tambi tiikoyoolu la, kaatu n ka i la luwaalu le muta.

¹⁰¹M balanta le ka bula kuu jawu kelaalu la siloolu nooma, kaatu n lafita ite le la kumoo muta la.

¹⁰²Nte maŋ n koo dii i la karandiroolu la, kaatu ite le ka n karandi.

¹⁰³I la kumoolu diyaata nte ye le famfaŋ. Itolu le diyaata ka tambi liyo la.

¹⁰⁴N ka fahaamuroo ke le, ka bo niŋ i la luwaalu la, wo kamma la ŋa sila kuruŋolu bee le koŋ. Nun

¹⁰⁵I la kumoo mu n ye lampoo le ti, meŋ ka n siŋolu loodulaa bitaa, aduŋ a mu maloo le ti n na siloo kaŋ.

¹⁰⁶N kalita le ka laahidi bambandiŋo taa, ka i la luwaa timmariŋolu muta.

¹⁰⁷Yaawe, m mantoorajawuta le, n tankandi ka baluu, ka bo niŋ i la laahidoo la.

¹⁰⁸Yaawe, n na tenturoo niŋ duwaa muta, i ye n karandi i la luwaalu la.

¹⁰⁹N ka tara pareeriŋ ne waati-wo-waati, ka n niyo laa. M maŋ ñina i la yaamaroo la.

¹¹⁰Moo jawoolu ye kutindiŋo le laa n kamma, bari nte maŋ i la yaamaroolu soosoo.

¹¹¹I la luwaalu le mu n na sotofeŋ kummaalu ti fo abadaa. Ì ka n jusulandi le.

¹¹²Ŋa n sondomoo parendi le ka i la luwaa muta, fo abadaa. Samek

¹¹³Ŋa moolu koŋ ne, mennu ka hakili fula soto i la kuwo to, bari ŋa i la karandiroo kanu le.

¹¹⁴I mu n ye maabodulaa le ti, aniŋ tankaraŋ koteeroo*. Ŋa jikoo soto i la laahidoo to le.

¹¹⁵Alitolu kuu jawu kelaalu, ali bo m bala, fo n si n na Alla la yaamaroolu muta noo.

¹¹⁶Hee Yaawe, m maakoyi ka bo niŋ i la laahidoo la, fo n si baluu, aduŋ kana soŋ n na jikoo ye ke n ye maloo ti.

¹¹⁷I buloo duŋ n koto, ka n tanka, fo n si tu la n hakilitu la i la luwaalu to.

¹¹⁸Ite ye i baŋ moolu bee le to mennu ka ì koo dii i la luwaalu la, bayiri ì la feerentuŋyaa mu kuu kenseŋo le ti.

¹¹⁹Ite ye duniyaa moo kuruŋolu bee fayi le ko suntukunto feŋo. Wo kamma la nte ŋa i la karandiroolu kanu le.

¹²⁰I ñaasilaŋo ye a tinna le m fatewo ka jarajara, i la kiitiiteyoolu le ye n sila. Ayin

¹²¹Nte baarata tiliŋo niŋ tooñaa le la, kana n tu n tooralaalu bulu.

¹²²Loo i la dookuulaa ye tankoo daa to. Kana soŋ faŋ waralaalu ye n toora.

¹²³N korita i la kiisandiroo kotofeloo la le, aniŋ ka i la laahidi tilindiŋo taamandi n ye.

¹²⁴I la kanu bambaloo yitandi nte la, i la dookuulaa, i ye n karandi i la luwaa la.

¹²⁵Nte mu i la dookuulaa le ti, fahaamuroo dii n na, fo n si i la karandiroo loŋ.

¹²⁶Yaawe, waatoo siita le ka maamaŋ, kaatu moolu ka i la luwaa tiñaa le.

¹²⁷Nte de, ŋa i la yaamaroolu kanu le ka tambi sanoo la, hani saniforoo.

¹²⁸Wo kamma la n ka bula i la kumakaŋolu bee le nooma kewu, ŋa sila jenkeriŋolu bee le koŋ. Pe

¹²⁹I la karandiroolu kaawakuuyaata le, wo kamma la, ŋa ì muta n niyo le la.

¹³⁰I la kumoolu kotoo firiŋo ka maloo le dii, a ka moo kunimbaloo ñaamendi le.

¹³¹N ka tara hameriŋ i la yaamaroolu la le, fo n ka n daa yele.

¹³²I ñaa fayi n kaŋ, i ye balafaa n ye, ko i ka a ke moolu ye ñaameŋ, mennu ye i kanu.

¹³³N na simfaañaalu kanta n kana boyi, ka bo niŋ i la yaamaroo la, aduŋ kana soŋ kuu jawoo ye m mara.

¹³⁴M bondi mantoora moolu bulu, fo n si i la luwaalu muta noo.

¹³⁵I ñaa diyaa m fee, nte mu i la dookuulaa le ti, aduŋ i si n karandi i la luwaalu la.

¹³⁶N ñaajiyo ka feenee le komeŋ woyoo, kaatu moolu buka i la yaamaroo muta. Tisade

¹³⁷Yaawe, ite tilinta le, i la kiitiiteyoo mu tooñaa le ti.

¹³⁸I ye luwaalu mennu dii, tooñaa doroŋ ne mu, aniŋ tiliŋo.

¹³⁹N ka kamfaa le komeŋ niŋ i ye dimbaa le mala n kono, kaatu n jawoolu ye i ñaa kaasi i la kumoo la le.

¹⁴⁰I la laahidoo mu lanna kuwo le ti, aduŋ nte meŋ mu i la dookuulaa ti, ŋa a kanu le.

¹⁴¹Nte maŋ kummaayaa, aduŋ ì jututa n na le, bari m maŋ ñina i la luwaalu la.

¹⁴²I la tiliŋo be tu la a ñaama le fo abadaa, aduŋ i la karandiroo mu tooñaa le ti.

¹⁴³Mantooroo niŋ niikuyaa le laata n kaŋ, bari i la yaamaroolu le ka n seewondi.

¹⁴⁴I la karandiroolu be tu la tilindiŋ ne fo fawu, fahaamuroo dii n na, fo n si baluu. Kof

¹⁴⁵Hee Yaawe, n woosiita niŋ n sondomoo bee le la. N jaabi, m be i la yaamaroolu muta la le.

¹⁴⁶N kumboota i ye le. N tanka, fo n si i la luwaalu muta.

¹⁴⁷N ka wuli le janniŋ fanikewo, ka i la maakoyiroo woosii. Ŋa n jikoo loo i la kumoolu le kaŋ.

¹⁴⁸N ka tara n ñaa la le suutoo muumewo, ka m miira i la laahidoolu la.

¹⁴⁹Hee Yaawe, i lamoyi n na, i la kanu bambaloo kamma la. N niyo tanka ka bo niŋ i la kiitiiteyi tilindiŋo la.

¹⁵⁰Moolu be sutiyaa kaŋ n na le, mennu ka n toorandi ka bo niŋ ŋaniya jawuyaa la, ì ye ì koo dii i la yaamaroo la le fereŋ.

¹⁵¹Bari ite Yaawe be n daala le, aduŋ i la yaamaroolu bee mu tooñaa le ti.

¹⁵²Waati jaŋ koomanto, ŋa a karaŋ i la yaamaroolu to le ko, i ye ì londi le ka tu keriŋ fo abadaa. Res

¹⁵³N na bataa juubee, i ye n kiisa, kaatu m maŋ ñina i la yaamaroo la.

¹⁵⁴Loo n ye m boloo kaŋ, i ye m bondi n na bataa kono. N niyo tanka ka bo niŋ i la laahidoo la.

¹⁵⁵Moo kuruŋolu niŋ kiisoo teemoo jamfata le, kaatu ì buka bula i la luwaalu nooma.

¹⁵⁶Hee Yaawe, i la hiinanteeyaa warata le. N niyo tanka ka bo niŋ i la kiitiiteyi tilindiŋo la.

¹⁵⁷N toorandilaalu niŋ n jawoolu siyaata le, bari m maŋ n koo dii i la luwaa la.

¹⁵⁸Niŋ ŋa moo muritiriŋolu juubee, ì la kuwo ka n ñewuŋ ne, kaatu ì buka i la yaamaroolu muta.

¹⁵⁹Hee Yaawe, a juubee nte ŋa i la luwaalu kanu ñaameŋ. N niyo tanka ka bo niŋ i la kanu bambaloo la.

¹⁶⁰I la kumoolu bee le mu tooñaa ti, i la luwaa tilindiŋolu bee be tu la keriŋ ne fo abadaa. Sin

¹⁶¹Maralilaalu ka n toorandi le, daliila te a la, bari ite le la kumoo silaŋo be n sondomoo kono.

¹⁶²N ka seewoo i la laahidoo la le komeŋ niŋ moo ye naafulu baa tomboŋ.

¹⁶³Ŋa faniyaa foo koŋ ne, ŋa a haraamu, bari ŋa i la karandiroo kanu le.

¹⁶⁴Luŋ-wo-luŋ n ka i jayi le siiñaa woorowula, i la kiitiiteyi tilindiŋolu kamma la.

¹⁶⁵Moolu mennu ye i la karandiroo kanu, wolu ka tara kayira baa le kono. Feŋ te ì boyindi noo la.

¹⁶⁶Hee Yaawe, m be jikiriŋ ne ko i be n kiisa la le. N ka taama i la yaamaroolu le la.

¹⁶⁷N ka i la karandiroolu muta n niyo le la, aduŋ ŋa ì kanu kolenke le.

¹⁶⁸N ka i la yaamaroolu niŋ karandiroolu muta le, baawo i ka m baluuñaa bee le je. Tawu

¹⁶⁹Hee Yaawe, n na woosiyo ke mutataa ti i ñaatiliŋo la. Fahaamuroo dii n na ka bo niŋ i la kumoo la.

¹⁷⁰N na duwaa ke mutataa ti i ñaa koto. N kiisa ka bo niŋ i la laahidoo la.

¹⁷¹Jayiroo le be tu la bo la n daa ite ye, kaatu i ye n karandi i la luwaalu la le.

¹⁷²M be kali i la kumoo le laa la suukuwo ti, kaatu i la yaamaroolu bee le tilinta.

¹⁷³I maakoyiri buloo tu tilindiŋ n na, kaatu ŋa ñiŋ ne tomboŋ ka bula i la yaamaroolu nooma.

¹⁷⁴Hee Yaawe, m be ñaaniriŋ ne i ye n kiisa, i la kumakaŋo le ka n jusulandi.

¹⁷⁵N niyo tanka, fo n si i jayi, i ye m maakoyi ka kiitiyo teyi n ye.

¹⁷⁶N taata le taariŋ komeŋ saajii filiriŋo. N ñini, nte mu i la dookuulaa le ti, aduŋ m maŋ ñina i la yaamaroolu la.