Read Mandinka Jabuuroolu 122 Bible Online

Jabuuroolu 122 - Mandinka bible

Jabuuroolu 122

¹Moolu ka ñiŋ suukuwo le laa, niŋ ì be Alla Batudulaa Buŋo* waliŋ na. Dawuda la Jabuuroo le mu. N seewoota le kabiriŋ ì ko n ye ko, “Ali ŋà taa Yaawe* la buŋo to.”

²Kooni Yerusalaamu, saayiŋ a fele m̀ be looriŋ i dundaŋ daalu* teema.

³Yerusalaamu saatewo loota le a tembeta, aduŋ a bambanta ñoo bala.

⁴Lasiloolu bee ka naa jaŋ ne, mennu mu Yaawe la moolu ti, ka a tentu a too la, ka bo niŋ a la yaamaroo la, meŋ diita Banisirayila la.

⁵Mansasiiraŋolu londita Yerusalaamu jaŋ ne, ka kiitiyo taamandi, Dawuda koomalankoolu la mansasiiraŋolu le mu.

⁶Ali duwaa Yerusalaamu la kayiroo la, ka a fo ko, “Allamaa moolu firiŋ na, mennu ye i kanu.

⁷Allamaa kayiroo ye tara i la tata sansaŋolu kono, aniŋ tankoo, i la mansasuwolu kono.”

⁸M baadiŋolu niŋ n kafuñoolu la kuwo kamma la, m be a fo la Yerusalaamu ye ko, “Kayiroo ye tara i kono.”

⁹Yaawe ǹ na Alla Batudulaa Buŋo la kuwo kamma la, m be i la kuu kendoo le ñiniŋ na.