Read Mandinka Jabuuroolu 129 Bible Online

Jabuuroolu 129 - Mandinka bible

Jabuuroolu 129

¹Moolu ka ñiŋ suukuwo le laa, niŋ ì be Alla Batudulaa Buŋo* waliŋ na. Banisirayilankoolu, ali a fo ko, “Ì ye ntolu toorandi baake le, biriŋ m̀ foloodulaa.

²Ì ye ntolu toorandi baake le, biriŋ m̀ foloodulaa, hani wo ì maŋ i kutu ǹ na de.

³Ì ye ǹ koo kono faraŋ-faraŋ ne, komeŋ seneraŋ daboo ka balinsaa fara ñaameŋ.

⁴Yaawe* tilinta le, a ye m̀ firiŋ moo jawoolu bulu le.”

⁵Allamaa moolu mennu bee ye Siyoni* koŋ, ye bula maloo kono, ì ye kori.

⁶Allamaa ì ye ke komeŋ ñaamoo, meŋ falinta buŋo santo, meŋ ka jaa janniŋ a be meŋ na,

⁷nafaa te meŋ na, sako katirilaa si a buloo faa a la, waraŋ siimaŋ sitilaa si a ke kunsiti ti.

⁸Aduŋ tambilaalu te a fo la ko, “Allamaa Yaawe neema la ali ma. M̀ be neemoo duwaa la ali ye Yaawe too la.”