Read Mandinka Jabuuroolu 135 Bible Online

Jabuuroolu 135 - Mandinka bible

Jabuuroolu 135

¹Ali Yaawe* jayi.[57] Ali Yaawe jayi a too la. Alitolu mennu mu a la dookuulaalu ti, ali a jayi.

²Alitolu mennu ka loo ka baturoo ke a la buŋo kono, ǹ na Alla batudulaa luwolu to, ali a jayi.

³Ali Yaawe jayi, kaatu a beteyaata le. Ali suukuwolu laa ka a jayi a too la, kaatu a konotoo diyaata le.

⁴Yaawe ye Yaakuba koomalankoolu tomboŋ a faŋo le ye, a ye Banisirayilankoolu ke a faŋo ye le komeŋ sanoo niŋ luuluwo.

⁵Nte ŋa a loŋ ne ko Yaawe warata le, ntolu Maariyo le warabaata ka tambi alloolu bee la.

⁶Meŋ diyaata Yaawe ye, a ka wo le ke, Arijana niŋ duniyaa kono, fankaasoolu niŋ diinoŋolu kono.

⁷Ate le ka tawaloolu ke santo duniyaa daŋolu to, a ka saŋ ŋalasoo ke samaajiyo ye, aduŋ a ka foñoo bondi naŋ a la foñobuŋolu le kono.

⁸Ate le ye Misirankoolu la konoñaa foloolu bee faa, biriŋ moolu to ka taa fo beeyaŋolu.

⁹Ate le ye taamanseeroolu niŋ kaawakuwolu jindi Misira bankoo kaŋ, Firawoona niŋ a la dookuulaalu bee kaŋ.

¹⁰Ate le ye banku koteŋ jamaalu kasaara, aduŋ a ye mansa sembemaalu faa le,

¹¹komeŋ Sihoni, Amorinkoolu la mansa, aniŋ Oki, Basani tundoo mansa, aniŋ Kanaani mansamarali bankoolu bee.

¹²A ye ì la bankoolu ke keetaafeŋo le ti, a ye ì dii a la moolu Banisirayilankoolu la ka a keetaa.

¹³Yaawe, i too le be tu la fo abadaa, i too la boo be tu la le jamaanoolu bee la.

¹⁴Yaawe le be kiitiyo teyi la a la moolu ye, aduŋ a be balafaa la a la dookuulaalu ye le.

¹⁵Duniyaa moolu ye mennu dadaa ì buloolu la sanoo niŋ kodiforoo la, ì ye wolu le ke ì la Alla ti.

¹⁶Daalu be ì la, bari ì buka diyaamu noo. Ñaalu be ì la, bari ì buka i je.

¹⁷Tuloolu be ì la, bari ì buka i moyi noo. Niyo faŋo le te ì la.

¹⁸Mennu ye ì dadaa, ì fanaa be wo le ñaama, aniŋ mennu bee laata ì la.

¹⁹Alitolu Banisirayilankoolu, ali Yaawe tentu, alitolu Haaruna koomalankoolu,[58] ali a tentu.

²⁰Alitolu Lewi lasiloo moolu,[59] ali Yaawe tentu, alitolu mennu bee ye Yaawe kuliyaa, ali a tentu.

²¹Tentoo ñanta Yaawe ma Siyoni* kono le, ate meŋ taradulaa be Yerusalaamu. Ali Yaawe jayi.