Read Mandinka Jabuuroolu 138 Bible Online

Jabuuroolu 138 - Mandinka bible

Jabuuroolu 138

¹Dawuda la Jabuuroo. Hee Yaawe*, m be i tentu la niŋ n sondomoo bee le la. M be suukuwo laa la le ka i tentu sembetiyolu[60] ñaatiliŋo la.

²M be sujudi la i la buŋ senuŋo ñaatiliŋo la le, m be i tentu la i too la le, i la kanu bambaloo niŋ i la tiliŋo kamma la. Kaatu i ye i too niŋ i la laahidoo le kuliyandi ka tambi feŋo bee la.

³Tuma meŋ na ŋa i kumandi, i ye n jaabi le. I ye n niyo bambandi kuu le.

⁴Hee Yaawe, duniyaa mansoolu bee be i jayi la le, niŋ ì ye i la kumoolu moyi.

⁵Ì be suukuwo laa la le ñiŋ kamma i ye kuwolu mennu ke, aniŋ i la horomoo la waroo kamma la.

⁶Yaawe warata ñaa-wo-ñaa, a ka fammajiilaalu hati le, bari a ka faŋ waralaalu kekuwolu loŋ ne ka bo jamfa jaŋo to.

⁷Hani niŋ mantooroo naata n ye karoo bee la, ite le ka n niyo tanka. Ite le ka i buloo kuntuntee n jawoolu ñaato, niŋ ì be kamfaariŋ n kamma, aduŋ i ka n kiisa niŋ i bulubaa buloo le la.

⁸Hee Yaawe, i be i la natoolu timmandi la n ye le. Yaawe, i la kanu bambaloo be tu la le fo abadaa. Kana i buloo bo dookuwo to i ye meŋ dati.