Read Mandinka Jabuuroolu 139 Bible Online

Jabuuroolu 139 - Mandinka bible

Jabuuroolu 139

¹Meŋ be suukuulaa ñaatonkayaa la: Dawuda la Jabuuroo le mu. Yaawe*, i ye n kusonsoŋ ne, aduŋ i ye n loŋ ne.

²I ye n siitoo niŋ n lootoo loŋ ne. I niŋ n teemoo jamfata ñaa-wo-ñaa, i ye n na miiroolu bee kalamuta le.

³I ka m fintitoo aniŋ n duntoo bee koroosi le, aduŋ i ka n taaraŋ siloolu bee fahaamu le.

⁴Hani janniŋ m be kumoo fo la, meŋ be n to, ite Yaawe ye a loŋ ne fokabaŋ.

⁵I ye n sansaŋ kooma niŋ ñaato bee le la, aduŋ i ye i buloo laa n kaŋ ne ka n tanka.

⁶I ye loŋo meŋ ke n na, a kaawakuuyaata m fee le, a tambita n kunna le, n na fahaamuroo maŋ futa a ma.

⁷N si taa noo mintoo le ka kana i ma? N si bori noo mintoo le i te daameŋ?

⁸Hani niŋ n seleta saŋo le santo, i be jee le. Niŋ ŋa n laa kaburu dinkoo kono, i be jee le.

⁹Hani niŋ ŋa dampaŋo le soroŋ, n tiita ka taa tiloo ka bo daameŋ to, waraŋ ka taa fankaasoo daŋo to,

¹⁰i be tara la jee le ka n kanda, aniŋ ka m muta niŋ i bulubaa buloo la.

¹¹Hani niŋ n ko diboo le ye m muuri, waraŋ m be maloo meŋ kono, a ye ke suutoo ti,

¹²diboo maŋ dibi ite fee, aduŋ suutoo ka mala i ye le ko tiloo, kaatu diboo mu ite fee maloo le ti.

¹³Feŋ-wo-feŋ be n kono, ite le ye a daa. Ite le ye n coki ñoo bala m baa wuluuñaŋo kono.

¹⁴Ŋa i tentu le, kaatu i ye n daa ñaameŋ, a jaakaloo warata le, aduŋ a kaawakuuyaata. I la keroolu tambita n kunna le. Nte ye wo loŋ ne kendeke.

¹⁵M muluŋo maŋ maabo i ma, kabiriŋ i ye n daa kulloo kono kuuke, biriŋ m be daa la ñoo bala m baa wuluuñaŋo kono.[61]

¹⁶I ye m meremmaa je le. I ye luŋolu mennu londi n ye, ì bee safeeta i la kitaaboo kono le, hani janniŋ kiliŋ be dati la.

¹⁷Kooni Alla, i la miiroolu kuliyaata n na fahaamuroo ti le, n te ì daŋo bondi noo la.

¹⁸N te ì yaatee noo la, kaatu ì be siyaa la bankumunkoo ti le. Niŋ n wulita, hani ka bii i be m fee le.[62]

¹⁹Hee Alla, n diinoo niŋ n sawoo, i ye moo kuruŋolu faa, aniŋ ka moofaalaalu bayi m bala.

²⁰Ì ka i sooki niŋ kuu jawoolu le la, ì ka kuma jawoolu le fo i ma.

²¹Yaawe, nte ye moolu koŋ ne, mennu ye ite koŋ, aduŋ n ñewunta moolu la le, mennu ka balaŋ i ma.

²²Ŋa ì koŋ jawuke le, ŋa ì muta le ko n jawoolu.

²³Kooni Alla, n kusonsoŋ ka n sondomoo kono loŋ. N kotobo ka n na miiroolu loŋ.

²⁴A juubee fo kuu jawu si tara n kono, aduŋ i si n kanda siloo kaŋ, meŋ be labaŋ na fo abadaa.