Read Mandinka Jabuuroolu 143 Bible Online

Jabuuroolu 143 - Mandinka bible

Jabuuroolu 143

¹Dawuda la Jabuuroo. Hee Yaawe*, n na duwaa moyi, i lamoyi n na daaniroo la. N jaabi, kaatu i tilinta le, aduŋ i konotoo seneyaata.

²Kana i la dookuulaa kiitindi, kaatu moo te keriŋ meŋ tilinta ite ñaa koto.

³Nte jawoo ye m bayindi le, aduŋ a ye n korindi le las. A ye n dundi dibi fiŋo le kono, n ka munta moolu mennu faata waati jaŋ koomanto.

⁴A ye a tinna le n jikilateyita, n keñaa bee le bota n kono.

⁵N hakiloo muruta tiloolu le kaŋ mennu tambita waati jaŋ koomanto, ŋa m miira i la keroolu bee la le, ŋa n hakiloo duŋ ne i ye kuwolu mennu ke.

⁶Ŋa m buloolu wulindi i ye le ka duwaa. N niyo suulata i la le, komeŋ niŋ jaa lookuta, banku jaaroo ka suula jiyo la ñaameŋ. S

⁷Hee Yaawe, n jaabi katabake, n jikilateyita le. Kana i ñaa faa m ma, niŋ wo nte n si taa laakira.

⁸Kali m moyirindi i la kanu bambaloo la fanoo la ke tumoo la, kaatu n jikoo be ite le kaŋ. Siloo yitandi n na, n ñanta taa la meŋ na, kaatu ŋa n sondomoo loo ite le kaŋ.

⁹Hee Yaawe, n tanka n jawoolu ma, ŋa tankoo ñini ite le fee.

¹⁰N karandi ka i la lafoo ke, kaatu ite le mu n na Alla ti. Ka bo niŋ i la konotodiyaa la n kanda sila koyiriŋo kaŋ.

¹¹Yaawe, i too kamma la, n niyo tankandi. I la tiliŋo kaŋ, m bondi mantooroo kono.

¹²I la kanu bambaloo kaŋ n jawoolu siyo kuntu, i ye n toorandilaalu kasaara, kaatu nte mu i la dookuulaa le ti.