Read Mandinka Jabuuroolu 147 Bible Online

Jabuuroolu 147 - Mandinka bible

Jabuuroolu 147

¹Ali Yaawe* jayi.[66] Ka ǹ na Alla jayi niŋ suukuwolu la, wo mu kuu kende le ti. Ka a jayi, wo mu kuu diimaa le ti, aduŋ a ñanta le.

²Yaawe ye Yerusalaamu seyinkaŋ loo le, a ye Banisirayila moo mutariŋolu murundi naŋ ne.

³A ye moolu wakiilindi le mennu jikilateyita, aduŋ a ye ì la baramoolu jaara le.

⁴A ye looloolu daa le, a lafita yaatewo meŋ na, a ye ì bee toolaa.

⁵M̀ Maariyo warata le, a semboo warata le, a la ñaameŋo tambita sumaŋo la le.

⁶Yaawe le ka moo sembentaŋolu sikandi, bari a ka moo kuruŋolu jindi duuma le.

⁷Ali tenturu suukuwolu laa Yaawe ye. Ali kosiri diimaa ke ǹ na Alla ye kontiŋo la.

⁸A ka saŋo bala bee ke tawaloolu le ti, a ye sanjoo jindi naŋ bankoo kaŋ, a ye ñaamoo falindi konkoolu kaŋ.

⁹A ka domoroo dii beeyaŋolu la le, a ka kunu diŋolu[67] daañini, niŋ ì woosiita.

¹⁰Ka tara jikiriŋ suwoo la sembe waroo la, wo maŋ ke Yaawe la kontaani kuu ti. Ka tara jikiriŋ hadamadiŋo la siŋ tariyaa la, wo maŋ ke a diyaŋñe kuu ti.

¹¹Bari Yaawe ka kontaani moolu le la kuwo la, mennu ye a kuliyaa, mennu be jikiriŋ a la kanu bambaloo la.

¹²Kooni Yerusalaamu, Yaawe la waroo fo. Kooni Siyoni*, i Maarii Alla tentu.

¹³A ka i daa tawundaŋolu bambandi le, a ye neema moolu ma mennu be i kono.

¹⁴A ka kayiroo sabatindi i la naanewolu to le, aduŋ a ka i daañini siimaŋ kese kendoolu le la.

¹⁵A ka yaamaroo jindi naŋ duniyaa kono le, aduŋ a la kumoo ka ke le katabake.

¹⁶A ka komboo feenendi le ko kotondoo, a ka jiyo kankammaa janjandi le ko seebuutoo.

¹⁷A ka samberendiŋolu joloŋ ne, moo buka sumayaa muña noo, a ka meŋ jindi naŋ.

¹⁸A ka kumoo fo le, a bee ye yooyi, a ye foñoo boyindi, jiyo ye bori kotenke.

¹⁹A ye a la kumoolu dii Yaakuba koomoo la le, meŋ mu Banisirayila ti, a ye a la yaamaroolu niŋ luwaalu dii ì la le.

²⁰A maŋ wo ke banku koteŋ ye, wolu maŋ a la luwaalu loŋ. Ali Yaawe jayi.