Read Mandinka Jabuuroolu 148 Bible Online

Jabuuroolu 148 - Mandinka bible

Jabuuroolu 148

¹Ali Yaawe* jayi.[68] Ali Yaawe jayi ka bo Arijana kono santo. Alitolu mennu be alihawaa kono, ali a jayi.

²A la malaayikoolu bee, ali a jayi. Alihawaa kono sembemaalu, ali a jayi.

³Karoo niŋ tiloo, ali a jayi. Looloolu mennu ka mala, ali a jayi.

⁴Saŋ fatoo daŋolu, aniŋ jiyolu mennu be saŋ fatoolu ye santo la, ali a jayi.

⁵Daaroo bee, ali Yaawe jayi a too la, kaatu ate le ye ali daa ka bo niŋ a la kumoo la.

⁶A ye ali londi le fo abadaa. A la kaŋo kaŋ ali te bo la ali ñaama.

⁷Ali Yaawe jayi ka bo bankoo kaŋ. Baakono daafeŋ baalu aniŋ fankaasoo duumoolu bee,

⁸ka taa saŋ ŋalasoo niŋ saŋ beroo, komboo niŋ tawaloolu, aniŋ turubaadoo, mennu ka a la yaamaroolu taamandi, ali a jayi.

⁹Konkoriŋ, konko baa, yiri dinnaalu, sedari* yiroolu bee, ali a jayi.

¹⁰Wulakono daafeŋolu niŋ beeyaŋolu, kuruntu feŋolu ka taa kunoolu bee, ali a jayi.

¹¹Duniyaa mansoolu niŋ siyolu bee, maralilaalu niŋ kiitiikuntulaalu, ali a jayi.

¹²Dindiŋ, keebaa, musu kafuriŋ kee, ali a jayi.

¹³Daaroo bee, ali Yaawe jayi a too la, kaatu a too le warata doo koteŋolu bee ti. A la kallankeeyaa* le tambita feŋo bee la, biriŋ bankoo kaŋ fo saŋo ye santo la.

¹⁴A ye semboo dii a la moo tilindiŋolu la le, meŋ keta a la moolu ye horomoo ti, wo le mu Banisirayilankoolu ti, mennu sutiyaata a la. Ali Yaawe jayi.