Read Mandinka Jabuuroolu 19 Bible Online

Jabuuroolu 19 - Mandinka bible

Jabuuroolu 19

¹Meŋ be suukuulaa ñaatonkayaa la: Dawuda la Jabuuroo le mu. Saŋ fatoolu ka Alla la kallankeeyaa* bankee le, minaayoolu ka a buloo la daaroo kankulaa le.

²Luŋ-wo-luŋ ì ka tu diyaamoo la le, suuto-wo-suuto ì ka londoo le feenee.

³Ì la diyaamoo buka ke kumakaŋo ti, ì kaŋo buka moyi.

⁴Hani wo, ì la kankulaaroo ka janjaŋ duniyaa bee kono le, aduŋ ì la kumakaŋolu ka futa duniyaa daŋolu bee le to. Alla ye buŋo le ke tiloo ye saŋ fatoolu kono.

⁵A ka finti naŋ a la buŋo kono le, komeŋ maañoo keemaa, komeŋ niŋ borilaa be i paree kaŋ ñooseeyaa boroo la.

⁶A ka wuli naŋ saŋo daŋo to le, a ye taa fo a daŋ doo to, aduŋ feŋ buka maabo noo a la kandoo ma.

⁷Yaawe* la yaamaroo timmata le, a ka niyo bambandi kuu le. Yaawe la karandiroo koyita le, a ka kunimbaloo ñaamendi le.

⁸Yaawe la yaamaroolu tilinta le, ì ka jusulaa le dii. Yaawe la luwaalu seneyaata le, ì ka hakiloo la jeroo fanundi le.

⁹Yaawe ñaasilaŋo mu kuu kendoo le ti, a be tu la le fo abadaa. Yaawe la luwaalu mu tooñaa le ti, aduŋ ì bee le ka tiliŋ.

¹⁰Itolu le mu ñaanitaa ti ka tambi sanoo la, hani saniforoo. Itolu le diyaata ka tambi liyo la, meŋ ka suleŋ lii kaañoo bala.

¹¹Wo koolaa, ì ka nte i la dookuulaa kalamutandi le, aniŋ fanaa joori baa le be ì mutoo to.

¹²Jumaa le ka a faŋo la boyidaalu je noo? Yaawe, yamfa n na sootaaroolu ma, m maŋ mennu kalamuta.

¹³N tanka tawunteeyaa junube kewo ma. Kana m bula ŋa tara wolu la maroo to. Wo le to n te sootaari soto la, aduŋ n si seneyaa junube kuu jawoolu to.

¹⁴Hee Yaawe, ite le mu n na semberaŋ beroo ti, aniŋ m bondilaa. Allamaa n daakumoolu niŋ n sondomoo kono miiroolu ye ke i ñaa koto mutataa ti.