Read Mandinka Jabuuroolu 22 Bible Online

Jabuuroolu 22 - Mandinka bible

Jabuuroolu 22

¹Meŋ be suukuulaa ñaatonkayaa la: A si ke niŋ juloo la ì ka a fo meŋ ye ko, “Fanikee minaŋo.” Dawuda la Jabuuroo. N na Alla, n na Alla, muŋ ne ye a tinna i ye nte bula? Muŋ ne ye a tinna i maŋ m maakoyi? M be ŋuntaŋ kaŋ ne, muŋ ne ye a tinna i jamfata n na?

²Hee n na Alla, n woosiita i ye le tiloo ñaa la, bari i maŋ n jaabi, aniŋ suutoo la, bari m maŋ dahaa soto.

³Hani wo ite le mu Alla senuŋo ti, aduŋ Banisirayilankoolu ye i la mansasiiraŋo kuliyaa niŋ jayiroo le la.

⁴Ǹ na alifaa foloolu ye ì jikoo loo ite le kaŋ, ì jikita i la, aduŋ i ye ì tanka le.

⁵Ì woosiita ite le ye, aduŋ i ye ì tanka le. Ì ye ì jikoo sembe ite le la, aduŋ ì maŋ jikilateyi.

⁶Bari nte wo maŋ ke moo ti, n ka munta le ko tumboo, moolu jututa n na, aduŋ ì ye n ke jelefeŋo ti.

⁷Moo-wo-moo ye n je a ka n ñaawali le. Ì ka ì neŋolu le bondi n ye, ka ì kuŋolu jiijaa, ì ka a fo ko,

⁸“A ye a faŋ karafa Yaawe* le ma, batu a ye a kiisa. Batu a ye a tankandi, bayiri a la kuwo ye a kontaani le.”

⁹Tooñaa, ite le ye m bondi kuu m baa wuluuñaŋo kono. Ite le ye n tankandi, biriŋ m be m baa sunjoo to.

¹⁰M be ite le fee kabiriŋ n wuluu luŋo la, aduŋ m be ite le bulu biriŋ m baa be n soto la.

¹¹Kana jamfa n na, kaatu kataa sutiyaata n na le, aduŋ moo te jee meŋ si maakoyiroo dii.

¹²Jawoolu jamaa le ye m murubeŋ, komeŋ ninsituuraalu, ì ye m murubeŋ karoo bee le la, ì ka munta le ko Basani tundoo ninsituuraa saŋaroolu.

¹³Ì ka ì daalu yele n kaŋ ne komeŋ jatoolu, ì ka bumbuŋ aniŋ ka kirimbaasi n kaŋ.

¹⁴M fankoo suusuuta le komeŋ niŋ jiyo bonta bankoo to. N kuloolu bee bota ì cokoolu daa le, n jusoo keta n kono komeŋ niŋ kaañoo yelunta.

¹⁵M fankoo suusuuta le ka jaa, a keta le komeŋ fenkeŋ teleŋo, aduŋ n neŋo karata n naaliŋo bala. I ye n tu laariŋ saayaa daa le to, buutoo kono.

¹⁶N jawoolu ye m murubeŋ ne ko wulu koorewo, moo jawu kafoo le ye n kuru ka m beŋ, ì ye m buloolu niŋ n siŋolu soo le.

¹⁷N kuloolu bee faramansata le fo m faŋo si ì konti noo. N jawoolu ka n juubee le, ka jutunnayaa tiliŋ n na.

¹⁸Ì ka alikuuroo* le ke n na duŋ feŋolu kunna, ka ì talaa ñoo teema.

¹⁹Hee Yaawe, kana jamfa n na. Ite le mu m fankoo ti, naa katabake i ye m maakoyi.

²⁰N niyo tanka n jawoolu la hawusaroo* ma. N niyo tanka ñiŋ wulu saŋaroolu ma, ŋa nii kiliŋo meŋ soto.

²¹N tankandi ñiŋ jatoolu daa ma, m be teeririŋ ñiŋ ninsituuraalu ñaatiliŋo la le.

²²M be a fo la m baadiŋolu ye le. M be i jayi la baturilaalu la beŋo to le.

²³Alitolu mennu ye Yaawe kuliyaa, ali a jayi, alitolu Yaakuba koomalankoolu, ali a horoma, alitolu Banisirayilankoolu bee, a ñaasilaŋo si tara ali la.

²⁴A buka jutu moo bataariŋolu la sako ka ñewuŋ ì la, ì la bataa kono, bari a ka ì jaabi le niŋ ì woosiita a ye maakoyiroo la.

²⁵N na jayiroo kafu baa teema sunta ite le la. M be n na laahidoolu timmandi la moolu ñaa la le, mennu ye i kuliyaa.

²⁶Fentaŋolu be domoroo ke la le ì ye kaañaŋ. Moolu mennu ka Yaawe ñiniŋ, wolu le be a jayi la. Allamaa ali ye jusulaa fo abadaa.

²⁷Duniyaa fannaa bee la, moolu hakiloo be bula la Yaawe la le, aduŋ ì be muru la a kaŋ ne. Bankoolu la siyolu bee le be sujudi la a ñaatiliŋo la.

²⁸Maraloo mu Yaawe le taa ti, aduŋ ate le marata bankoolu ma.

²⁹Duniyaa fankamaalu bee be juuraloo ke la le, ka baturoo ke. Moo-wo-moo be labaŋ na bankoo kono be sujudi la a ye le, wolu mennu te ì faŋ tundi noo la baluwo to.

³⁰Ñaato jamaanoolu be a batu la le. Moolu le be Maariyo la kuwo fo la jamaani naalaalu ye,

³¹ka a fo moolu ye mennu maŋ wuluu foloo, a ye a la moolu tankandi ñaameŋ. Ate le ye wo ke.