Read Mandinka Jabuuroolu 25 Bible Online

Jabuuroolu 25 - Mandinka bible

Jabuuroolu 25

¹Dawuda la Jabuuroo. Hee Yaawe*, ŋa n sondomoo loo ite le kaŋ.

²N na Alla, ŋa n jikoo loo ite le kaŋ. Kana soŋ ŋa bula maloo kono. Kana n jawoolu bula ì ye jele n na.

³Kana soŋ moolu mennu ka tara i baturiŋ, wolu ye bula maloo kono, bari moolu malundi mennu la kuruŋyaa, daliila te a la.

⁴Yaawe, i la siloolu yitandi n na, i ye n karandi n taañaa la.

⁵N kanda i la tooñaa kono, i ye n karandi, kaatu ite le mu Alla ti meŋ ka n kiisa. N jikoo ka tu semberiŋ ite le la luŋ-wo-luŋ.

⁶Hee Yaawe, kana ñina i la konotodiyaa niŋ i la kanu bambaloo la, i ka meŋ yitandi biriŋ koomanto.

⁷Kana i miira tawunteeyaa junuboolu la, ŋa mennu ke n na fondinkeeyaa waatoo kono. Hee Yaawe, i miira n na i la kanu bambaloo kamma la, aniŋ i la beteyaa.

⁸Yaawe beteyaata le, aduŋ a tilinta, wo kamma la a ka junubelaalu karandi a la siloolu la le.

⁹A ka fammajiilaalu kanda tiliŋo le kono, aduŋ a ka ì karandi a la siloo la le.

¹⁰Yaawe ka kuwo bee taamandi tiliŋo niŋ kanu bambaloo le kono moolu ye mennu ka a la kambeŋo muta, aniŋ a la yaamaroolu.

¹¹Yaawe, i too kamma la yamfa n na kuu jawoolu la, ì siyaata le.

¹²Moo-wo-moo ye Yaawe kuliyaa, a be siloo yitandi la a maarii la le, a ñanta ka taa meŋ na.

¹³Wo maarii faŋo be tu la firiŋo le kono, aduŋ a koomalankoolu le taa be ke la bankoo ti.

¹⁴Moolu mennu ye Yaawe kuliyaa, wolu le mu a la jiki moolu ti, aduŋ a ka a la kambeŋo koyindi ì ma le.

¹⁵Ŋa n ñaa tiliŋ Yaawe doroŋ ne la ka m maakoyi, kaatu ate le si m bondi noo n jawoolu la kutindiŋo daa.

¹⁶Yaawe, n juubee, i ye balafaa n ye, kaatu n kiideeta le, aduŋ n toorata.

¹⁷N na niitooroo lafaakuuta le.[7] M bondi n na mantooroo kono.

¹⁸I miira n na mantooroo niŋ n na ŋayiboo la, i ye yamfa n na junuboolu bee la.

¹⁹I miira n jawoolu la siyaañaa la, aniŋ ì ye n koŋ jawuke ñaameŋ.

²⁰Dukaree, n niyo kanta, i ye n tankandi. Kana soŋ ŋa bula maloo kono, kaatu ŋa tankoo ñini ite le bulu.

²¹Allamaa n na sootaaribaliyaa niŋ n na tiliŋo ye n tankandi, kaatu n jikoo be ite le kaŋ.

²²Hee Alla, i la moolu, Banisirayilankoolu bondi ì la mantoora kuwolu bee kono.