Read Mandinka Jabuuroolu 30 Bible Online

Jabuuroolu 30 - Mandinka bible

Jabuuroolu 30

¹Dawuda la Jabuuroo. Alla Batudulaa Buŋo* kerekerelaŋ suukuwo. Hee Yaawe*, m be i tentu la le, kaatu i ye n kanandi le, aduŋ i maŋ soŋ n jawoolu ye jele n na.

²Yaawe n na Alla, n kumboota i ye le ka m maakoyi, aduŋ i ye n kendeyandi le.

³Hee Yaawe, i ye n tanka kaburoo ma le. Domandiŋ n si taa dinkoo kono, bari i ye m murundi baluwo to le.

⁴Ali suukuwo laa Yaawe ye, alitolu mennu mu a la moolu ti. Ali i miira a ye meŋ ke, ka a tentu a too la kuliyaa kaŋ.

⁵Kaatu a la kamfaa loo mu waatindiŋ ne ti, bari a la konotodiyaa la mewo mu siyo daŋo le ti. Kumboo si tara keriŋ noo suutoo, bari seewoo ka naa le soomandaa.

⁶Biriŋ ŋa a loŋ ko m firinta le, n kumata ko, “Feŋ te m bondi la n noo to fo fawu.”

⁷Yaawe, ka bo niŋ i la konotodiyaa la, i ye n londi le m bambanta, komeŋ konkoo. Bari biriŋ i ye i ñaa kaasi n na, n jikilateyita le.

⁸Yaawe, ŋa i kumandi le, m Maariyo, n woosiita i ye balafaa la ko,

⁹“I be muŋ ne soto la nte la saayaa to? Nte la taa dinkoo kono, nafaa le be ite ye wo to baŋ? Fo bankumunkoo be i tentu la le baŋ? Fo a be i la beteyaa bambaloo fo noo la le baŋ?

¹⁰Hee Yaawe, i lamoyi n na, i ye balafaa n ye. Yaawe, ke m maakoyilaa ti.”

¹¹I ye n na kumboo yelemandi n ye doŋo le ti. I ye niikuyaa booto funtoo wura n na le, i ye seewoo dendikoo duŋ n na.

¹²Wo to m be i tentu la niŋ suukuwo la le, aduŋ n te n deyi la. Hee Yaawe, n na Alla, m be i jayi la le fo abadaa.