Read Mandinka Jabuuroolu 33 Bible Online

Jabuuroolu 33 - Mandinka bible

Jabuuroolu 33

¹Alitolu moo tilindiŋolu, ali seewoo Yaawe* la kuwo la, jayiroo ñiiñaata moo tilindiŋolu le daa kono.

²Ali kontiŋo kosi ka Yaawe jayi, ali ye kooraa taa ka a jayi a la.

³Ali suukuu kutoo laa a ye, ka kooraa kosi a ye kendeke, ali ye wuuri, seewoo kamma la.

⁴Kaatu Yaawe la kumoo tilinta le, aduŋ a ka a la keroolu bee taamandi tiliŋo le la.

⁵A ye tiliŋo niŋ kiitindiri senuŋo le kanu. A la kanu bambaloo ye duniyaa bee le beŋ.

⁶Yaawe ye saŋ fatoolu daa a la kumoo le la, tiloo, karoo, aniŋ looloolu daata a la kumakaŋo le la.

⁷A ye baajiyo bee kafu dulaa kiliŋo le to, a ye fankaasoolu duumoo bee ke jiibuŋolu kono.

⁸Bankoo daafeŋolu bee si sila Yaawe la, alitolu duniyaa moolu bee, ali a kuliyaa.

⁹Kabiriŋ a kumata, duniyaa daata, a ye yaamaroo dii, feŋo bee fintita.

¹⁰Yaawe le ka duniyaa bankoolu la natoolu ke ì ye kenseŋo ti. A ka ì la feeroolu janjaŋ ne.

¹¹Bari Yaawe la feeroolu be tu la looriŋ ne fo fawu. A la natoolu be taama la le fo abadaa.

¹²Neemoo be bankoo le ye, meŋ na Alla mu Yaawe ti. Seewoo be moolu le ye, a ye mennu tomboŋ ka ke a taa ti.

¹³Yaawe ka duuma juubee naŋ ne, ka bo naŋ Arijana kono, aduŋ a ka hadamadiŋolu bee le je.

¹⁴Ka bo a be siiriŋ a la mansabaayaa kono daameŋ, a ka daafeŋolu bee le juubee naŋ, bankoo kaŋ.

¹⁵Ate le ye sondomoo duŋ ì la, aduŋ ì ye kuu-wo-kuu baara, a ka a loŋ ne.

¹⁶Mansa la kelediŋ kafoo la sembe waroo buka a tinna a ye nooroo ke keloo to. Kelejawaroo semboo la waroo buka a tinna a ye tanka.

¹⁷Keleraŋ suwoo maŋ ke jikiraŋ ti, ka nooroo ke keloo to. A semboo la waroo buka tankoo saabu.

¹⁸Yaawe ka moolu kanta le, mennu ye a kuliyaa, mennu ye ì jikoo loo a la kanu bambaloo kaŋ.

¹⁹A ka ì tanka kerekere saayaa ma le, aduŋ a ka ì balundi le, konkoo waatoo la.

²⁰Ntolu ye ǹ jikoo loo Yaawe le kaŋ. Ate le mu m̀ maakoyilaa ti, aniŋ ǹ tankandilaa.

²¹Ǹ jusulaata ate le la kuwo to, kaatu ǹ jikita a too senuŋo le la.

²²Yaawe, Allamaa i la kanu bambaloo ye tara m̀ fee, bayiri ŋà ǹ jikoo sembe ite le la.