Read Mandinka Jabuuroolu 37 Bible Online

Jabuuroolu 37 - Mandinka bible

Jabuuroolu 37

¹Dawuda la Jabuuroo. Kana diminnaa moo jawoolu la kuwo kamma la. Kana ñaabo kuu kuruŋ kelaalu fee.

²Sambii ì be yeemaŋ na komeŋ ñaamoo, aduŋ ì be noro la le komeŋ fita juu kitiŋo.

³Dankeneyaa Yaawe* la, i ye baara kuu betoo la, fo i si baluu ñiŋ bankoo kaŋ tankoo kono.

⁴Seewoo Yaawe la kuwo la, aduŋ hame kuwolu mennu be i sondomoo to, a be ì dii la i la le.

⁵I faŋ seyi Yaawe ma, i ye laa a la, aduŋ a be i maakoyi la le.

⁶A be i la tiliŋo yitandi la le, a ye koyi lewu, aniŋ i boloo, komeŋ tilikuntewo.

⁷Muña Yaawe ye, i ye a batu. Kana diminnaa moolu la kuwo la, mennu ka ñaatotaa soto, mennu ka feere jawoolu taamandi, aduŋ a ka ì wati.

⁸Kamfaa bula, i ye i koo dii saŋaroo la. Kana diminnaa, wo ka kuu jawoo doroŋ ne saabu.

⁹Kaatu moo kuruŋolu be wafati la ñiŋ bankoo kaŋ ne, bari moolu mennu jikita Yaawe la, wolu le be ñiŋ bankoo keetaa la.

¹⁰Hani a te mee la, moo kuruŋolu be yeemaŋ na. I si ì ñiniŋ, bari i te ì je la.

¹¹Bari fammajiilaalu le be bankoo keetaa la, aduŋ ì be tara la seewooriŋ firiŋo le kono, aniŋ kayira baa.

¹²Moo jawoo ka feeroo siti moo tilindiŋo kamma le, fo a ka i ñimmakiŋ a kamma.

¹³Bari Maariyo ka jele moo jawoo la le, kaatu a ye a je le ko, sambii a la luŋo be sii la.

¹⁴Moo jawoolu ka ì la hawusaroolu* buusi le, ì ye ì la kalabeñoolu saba, ka paree fuwaaroolu faa la, aniŋ moo bataariŋolu, aniŋ ka moolu kanateyi, mennu ka taama tiliŋo la.

¹⁵Bari ì la hawusaroolu be ì faŋolu jusoo le soo la, aduŋ ì la kalabeñoolu be kati la le.

¹⁶Moo tilindiŋolu ye domandiŋo meŋ soto, wo le fisiyaata moo jawoolu la soto baa ti.

¹⁷Kaatu Yaawe be moo jawoolu fankoo baŋ na le, bari a be moo tilindiŋolu kanta la le.

¹⁸Yaawe ka sootaaribaloolu le la baluu tiloo kanta, aduŋ ì la keetaafeŋo be tu la le fo abadaa.

¹⁹Ì te bula la maloo kono koleyaa waatoo la. Konkoo waatoo la, ì konoo be faa la le.

²⁰Yaawe be moo kuruŋolu kasaara la le. A jawoolu be ke la le komeŋ wulakono firoo, ì be yeemaŋ na le komeŋ siisiyo.

²¹Moo jawoo ka dontoroo ke le, aduŋ a buka a joo, bari moo kendoo buloo warata sooroo to le.

²²Yaawe neemata mennu ma, wolu le be a la laahidi bankoo keetaa la, bari a ye mennu danka, wolu be wafati la bankoo kaŋ ne.

²³Yaawe le ka moo kanda a taaraŋ siloo kaŋ, aduŋ niŋ meŋ na kuwo ye a kontaani, a ka a maarii tanka le.

²⁴Hani niŋ a takita, a te boyi la, kaatu Yaawe le ye a buloo muta.

²⁵Kabiriŋ m be dindiŋ, fo saayiŋ n keebaayaata, n nene maŋ a je Maariyo ye a koo dii moo tilindiŋo la, waraŋ ka a diŋolu je domori daanoo la.

²⁶A ka sooroo ke kendeke le, aniŋ ka moolu donto, aduŋ a diŋolu ka ke neema moolu le ti.

²⁷I bo kuu jawoo to, i ye kuu kendoo baara, fo i si tu bankoo kaŋ fo abadaa.

²⁸Kaatu Yaawe ye tiliŋo le kanu, aduŋ a te a koo dii la a la moo tilindiŋolu la. A ka ì kanta le fo abadaa, bari moo jawoolu koomalankoolu, a be wolu wafati la bankoo kaŋ ne.

²⁹Moo tilindiŋolu le be bankoo keetaa la, ì koomoo be tu la jee le fo abadaa.

³⁰Moo tilindiŋo daakumoo mu ñaameŋo le ti, aduŋ a ka meŋ fo a neŋo la, wo mu tiliŋo doroŋ ne ti.

³¹A ka a Maarii Alla la karandiroo muta a sondomoo kono le, aduŋ a buka a lamfee.

³²Moo jawoo ka tara moo kendoo koroosi kaŋ ne, ka siloo ñini ka a faa.

³³Bari Yaawe te a tu la a ye a semboo taamandi a kaŋ, waraŋ ka a bula ì ye a muta kiitiyo kono.

³⁴I lamoyi Yaawe ma, i ye taama a la siloo la, aduŋ a be horomoo dii la i la le, ka bankoo keetaa, aduŋ i ñaa be moo jawoolu wafati luŋo je la le.

³⁵Ŋa moo jawoo je le, meŋ tilimbaliyaata, aduŋ a ye buŋ ka jaŋ, komeŋ Libanooni sedari* yiroo.

³⁶Bari ñaato, biriŋ m be tambi la, a te keriŋ kotenke, ŋa a ñini ñaa-wo-ñaa, m maŋ a je noo.

³⁷Moo kendoo koroosi, aduŋ i si moo tilindiŋo la kuwo hakilitu. Jikoo be kayiramoo ye le.

³⁸Bari junubentuŋolu be kasaara la le fereŋ, aduŋ moo jawoolu koomalankoolu be buruka la le.

³⁹Moo tilindiŋolu la tankoo ka bo Yaawe le bulu. Ate le mu ì la semberaŋo ti, mantooroo waatoo la.

⁴⁰A ka ì maakoyi le ka ì bondi. A ka ì bondi moo jawoolu bulu le, ka ì tankandi, kaatu ì tarata semberiŋ ate le la.