Read Mandinka Jabuuroolu 38 Bible Online

Jabuuroolu 38 - Mandinka bible

Jabuuroolu 38

¹Dawuda la Jabuuroo, ka Yaawe* hakiloo bulandi. Hee Yaawe, kana n jalayi i la kamfaa kaŋ, waraŋ ka n kuluu i la jusukandoo kaŋ.

²I ye n soo i la kalabeñoolu la le, aduŋ i buloo laata n kaŋ ne.

³I la kamfaa ye a tinna le, n jaatoo maŋ sahayaa. Kendeyaa te n kuloolu faŋo kono n na junuboolu kamma la.

⁴N na junuboolu la siyaa tambita n kunna le, ì dunoo kuliyaata n ti le.

⁵N na maadiŋolu tolita le fo ì ka sunkaŋ, n na tooleeyaa kamma la.

⁶N korita le las, m be laariŋ dek. Tiloo muumewo n ka tu woosiyo le la.

⁷M baloo kono ka kandi le ko dimbaa. Kendeyaa te n jaatoo kono.

⁸M fankoo banta le fereŋ, n ka munta ì ye meŋ toñonka fo a nunkuta. N ka ŋuntaŋ ne niitooroo kamma la.

⁹Maariyo, m be ñaaniriŋ kuu-wo-kuu la, i ye a loŋ ne. N na ŋuntaŋo maŋ tara i ye kumpa to.

¹⁰N kijoo ka tara sawuŋ na le. M fankoo banta le. N ñaa la fanoo faŋo talaata le.

¹¹N teeroolu niŋ n kafuñoolu jamfata n na, n na kuuraŋo kamma la. M baadiŋolu fanaa sabata n na.

¹²Moolu mennu ka n niyo ñini, ye ì la kutindiŋolu laa n kamma le, mennu ka n na mantooroo ñini, ka kasaaroo le fo m ma. Ì ka tu feeroolu le siti la n kamma.

¹³Bari nte de, n ka munta le ko, tulu sukiriŋo, meŋ buka i moyi, ko mumunoo, meŋ buka diyaamu noo.

¹⁴N ka munta ko, moo meŋ buka moyiroo ke, aniŋ jaabiri te meŋ daa.

¹⁵Bari m be jikiriŋ ite Yaawe le la, ite m Maarii Alla le be jaabiroo ke la n ye.

¹⁶Ŋa ñiŋ ne duwaa, i kana soŋ ì ye seewoo n kunna, wolu mennu ka kibiri n na boyoo la.

¹⁷Kaatu m be boyoo le daa to, aduŋ dimiŋo le ka tu n na doroŋ.

¹⁸N sonta n na junuboolu la le. Ì ye n dewuŋ ne.

¹⁹N jawu kumbaa jamaalu semboo warata le. Mennu ye n koŋ, daliila te a la, ì siyaata le.

²⁰Moolu mennu ka n na ñiiñaa joo jawuyaa la, ì keta m boyinkannaalu le ti, kaatu n ka bula kuu kendoo le nooma.

²¹Hee Yaawe, kana m bula. N na Alla, kana jamfa n na.

²²M Maariyo, n na Kiisandirilaa, naa n kaŋ tariyaake, ka m maakoyi.