Read Mandinka Jabuuroolu 4 Bible Online

Jabuuroolu 4 - Mandinka bible

Jabuuroolu 4

¹Meŋ be suukuulaa ñaatonkayaa la: A si ke niŋ kontiŋolu la. Dawuda la Jabuuroo le mu. Niŋ ŋa i kumandi, i danku m ma, ite Alla meŋ mu n na tiliŋo sababoo ti. I ye dahaa dii n na le, mantooroo waatoo kono, balafaa n ye, i ye n na duwaa jaabi.

²Janniŋ muŋ tuma le mu, alitolu moolu be tu la nte la horoma kuwo ke la n ye maloo ti, ka filibanteeyaa kanu, aniŋ ka bula faniyaa nooma? S

³Bari ali si a loŋ ko, Yaawe* ye moo tilindiŋolu le tomboŋ ka ke a la moolu ti. Niŋ ŋa Yaawe kumandi, a be n danku la le.

⁴Ali si kamfaa, bari a kana ali duŋ junuboo to. Ali ali sondomoolu kiitindi, niŋ ali be laariŋ ali la laaraŋo kaŋ, aduŋ ali si i deyi. S

⁵Ali sadaalu* bo, ko a ñanta ñaameŋ, aduŋ ali si dankeneyaa Yaawe la.

⁶Jamaa le ka ñininkaaroo ke ko, “Muna, m̀ be kuu betoo domandiŋ je noo la le baŋ?” Yaawe, i ñaa diyaa m̀ fee, i ye neema m̀ ma.

⁷I ye nte jusulandi le ka tambi n jawoolu la, hani ì ye siimaŋolu niŋ miŋ feŋ diimaalu soto ñaa-wo-ñaa.

⁸M be n laa la le dek, ŋa siinoo kayira kono, kaatu ite Yaawe doroŋ ne ka n sabatindi tankoo kono.