Read Mandinka Jabuuroolu 42 Bible Online

Jabuuroolu 42 - Mandinka bible

Jabuuroolu 42

¹Meŋ be suukuulaa ñaatonkayaa la: Kora koomalankoolu la suukuwo le mu. N niyo be ñaaniriŋ ite Alla le la ko minaŋo ka ñaani woyoo la ñaameŋ.

²Ite Alla baluuriŋo, i la kuwo mindoomaa le ye m muta. Muŋ tuma le m be naa noo la ka loo i ñaatiliŋo la?

³N ka kumboo le suutoo niŋ tiloo, aduŋ n ñaajiyo doroŋ ne mu n na domoroo ti. N jawoolu ka tu la a fo la n ye le ko, “I la Alla lee?”

⁴Niitooroo le ka faa n kono niŋ n hakiloo bulata koomanto la, n niŋ moo jamaalu ka taa Alla Batudulaa Buŋo* to ñaameŋ. N ka tambi ì ñaato le, ka tara suukuwo laa kaŋ santo niŋ seewoo la, ka Alla tentu juurali waatoo la.

⁵Muŋ ne ye nte jirandi teŋ, n niyo be fitiiriŋ n kono? N ñanta n jikoo loo la Alla le kaŋ, aduŋ m be a jayi la le kotenke, n na Alla, meŋ mu n na Kiisandirilaa ti.

⁶Hee n na Alla, n niyo korita le las, wo kamma la n ka m miira i la le ka bo ñiŋ Herimoni* Konkoo kaŋ, Yoridani Boloŋo datita daameŋ, Misari Konkoo to.

⁷I ye niikuyaa jiibalimmaalu le samba naŋ n kaŋ. N ka bumbuŋ kaŋo le moyi, meŋ dunta ñoo to. I ye mantooroo waamemaa le naati n kaŋ.

⁸Tiloo waatoo la Yaawe* be a la kanu bambaloo yitandi la n na le, aduŋ suutoo la a be suukuwo duŋ na n daa le, ka a ke duwaaraŋo ti Alla ye, n na baluwo Maariyo.

⁹Ate Alla meŋ mu n na semberaŋ beroo ti, n ka a fo a ye le ko, “Muŋ ne ye a tinna i ñinata n na? Muŋ ne ye a tinna m be tu la teŋ, komeŋ m be saŋakumboo le la, n jawoolu la m mantooroo kamma la?”

¹⁰Ì la nendiroolu ka duŋ n na le fo n kuloo kono, bayiri luŋ-wo-luŋ ì ka n ñininkaa le ko, “I la Alla lee?”

¹¹Muŋ ne ye nte jirandi teŋ, n niyo be fitiiriŋ n kono? N ñanta n jikoo loo la Alla le kaŋ, aduŋ m be a jayi la le kotenke, n na Alla, meŋ mu n na Kiisandirilaa ti.