Read Mandinka Jabuuroolu 44 Bible Online

Jabuuroolu 44 - Mandinka bible

Jabuuroolu 44

¹Meŋ be suukuulaa ñaatonkayaa la: Kora koomalankoolu la suukuwo. Kooni Alla, m̀ faŋolu tuloolu le ye a moyi, ǹ na alifaa foloolu ye a fo ǹ ye le, i ye kaawakuwolu mennu bee ke ì tiloo la, waati jaŋ koomanto.

²Ka bo niŋ i semboo la i ye sii koteŋolu bayi ka finti, bari i ye itolu sabatindi bankoo kaŋ ne. I ye wo sii koteŋolu jarabi le, bari i ye itolu yiriwandi le.

³Ì maŋ bankoo taa ka bo niŋ ì la hawusaroolu* la, waraŋ ka nooroo ke ì faŋolu semboo la. I semboo la waroo le ye a tinna, aniŋ i la taroo ì fee, ka a yitandi ko i ye ì kanu le.

⁴N na Alla, ite le mu n na Mansoo ti, ite le ka nooroo saabu Yaakuba koomalankoolu ma.

⁵Ite le ye m̀ maakoyi ka ǹ jawoolu ñori duuma, ka bo niŋ i semboo la ǹ ka m̀ boyinkannaalu dori le.

⁶M maŋ jiki n na kalabeñoo la, waraŋ n na hawusaroo ka n tankandi.

⁷Bari ite le ye ǹ tanka ǹ jawoolu ma, aduŋ mennu ye ǹ koŋ, i ye ì malundi le.

⁸Ntolu be tu la jayiroo la ite Alla kekuwolu la le, aduŋ m̀ be i tentu la i too la le fo abadaa. S

⁹Bari saayiŋ i ye i koo dii ǹ na le, i ye m̀ malundi. I maŋ tambi ǹ na kelediŋ kafoolu ñaato keloo la kotenke.

¹⁰I ye a tinna le ǹ ka bori ǹ jawoolu la, aduŋ mennu ye ǹ koŋ ka ǹ na feŋolu ke ñapinkantaa le ti.

¹¹I ye m̀ bula le ì ka ǹ kanateyi ko saajiyolu, aduŋ i ye ǹ janjandi banku koteŋolu kaŋ.

¹²I ye i la moolu waafi daa feemaa la, aduŋ i maŋ nafaa soto ì soŋo to.

¹³I ye ǹ dandanna moolu jutundi ǹ na, ì ka ǹ ñaawali ka jele ǹ na.

¹⁴I ye ǹ ke jelefeŋo le ti banku koteŋ moolu ye, sii koteŋolu ka ì kuŋo jiijaa ǹ ye.

¹⁵N ka tara dooyaa le kono. N na malu kuwo ka tara n ñaatiliŋo la luŋ-wo-luŋ,

¹⁶feŋ te fo ñaawaliroo niŋ nendiroo, n ka meŋ moyi n jawoolu niŋ n konnantewolu la.

¹⁷Ntolu maŋ ñina i la, waraŋ ka kambeŋo tiñaa, i ye meŋ siti ǹ niŋ i teema, ñiŋ kuwolu bee laata ǹ kaŋ ñaa-wo-ñaa.

¹⁸Ntolu sondomoolu maŋ bo ite kaŋ, sako ǹ si jenke i la siloo ye,

¹⁹hani wo i ye ǹ korindi le ka m̀ fili kunkuwuloolu kono, aduŋ i ye m̀ bula dibi baa kono.

²⁰Niŋ a ye a tara ntolu ñinata ǹ na Alla la le, waraŋ ŋà m̀ buloolu sikandi sii koteŋolu la batufeŋo le ye ka a batu,

²¹fo ite Alla te wo loŋ na baŋ? Bayiri ite ye sondomoo kono kulloolu bee le loŋ.

²²Ite la kuwo le ye a tinna ǹ ka tu faa la, ǹ keta le ko saajiyolu mennu ñanta kanateyi la.

²³Maariyo, dukaree wuli! Muŋ ne ye a tinna i be siinoo la? Wuli! Kana i koo dii ǹ na fo fawu.

²⁴Muŋ ne ye a tinna i ye i faŋ maabo m̀ ma? Muŋ ne ye a tinna i ñinata ǹ na bataa niŋ mantooroo la?

²⁵M̀ be kiripariŋ buutoo kono le, aduŋ ǹ te m̀ faŋ wulindi noo la.

²⁶Wuli, i ye naa m̀ maakoyi! Ǹ kiisa i la kanu bambaloo kamma la.