Read Mandinka Jabuuroolu 5 Bible Online

Jabuuroolu 5 - Mandinka bible

Jabuuroolu 5

¹Meŋ be suukuulaa ñaatonkayaa la: Footaŋolu si fee. Dawuda la Jabuuroo le mu. Hee Yaawe*, i lamoyi n na kumoolu la, moyiri ke n na ŋuntaŋolu la.

²N kumboo kaŋo moyi maakoyiri ñiniŋo la, n na Mansoo aniŋ n na Alla. Hee Yaawe, n ka ite le daani,

³i ka n kaŋo moyi le soomandaa, seyiloo n ka n na kuwo laa i ñaa koto le, ŋa i batu.

⁴I maŋ ke Alla ti, meŋ ka kontaani kuu jawoo la, moo kuruŋ te sabati noo la i fee.

⁵Faŋ wara moo te loo noo la i ñaa koto, i ye moolu bee le koŋ, mennu ka kuu jenkeriŋo ke.

⁶I ka faniyaa folaalu kasaara le, aduŋ moofaalaa niŋ neeneerilaa, ite Yaawe ye wolu haraamu le.

⁷Bari ka bo niŋ i la kanu bambaloo la, nte be duŋ na i la buŋo kono le, m be sujudi la i la buŋ senuŋo ñaatiliŋo la le, ka i kuliyaa.

⁸Yaawe, ite tilinta le, n kanda, n jawoolu la kuwo kamma la, i la siloo walaŋ n ye.

⁹Kuma buka bo ì daa, moo si laa meŋ na. Kasaaroo doroŋ ne ka tara ì sondomoo to. Ì ka neeneeroo ke ì neŋ kolomoo le la, jamfaa le ka tara sosoriŋ ì kono.

¹⁰Alla, ì la boyidaa yitandi, ì boyindi ì faŋolu la feeroolu la, ì la junube jamaalu kamma la, ì yeemandi, kaatu ì balanta i ma le.

¹¹Moolu mennu bee be bamburiŋ i kooma, si suukuwo laa fo fawu, kontaanoo kamma la, aduŋ i si i la tankoo wanka moolu kaŋ, mennu ye i kanu, fo ì si seewoo i la kuwo to.

¹²Kaatu Yaawe, i ka moo tilindiŋolu barakandi le, i ka ì muuri i la neemoo la, ka ke ì ye tankoo ti.