Read Mandinka Jabuuroolu 50 Bible Online

Jabuuroolu 50 - Mandinka bible

Jabuuroolu 50

¹Asafu la Jabuuroo. Sembetii Baa, Yaawe* Alla diyaamuta le, a ye duniyaa moolu bee kumandi ka bo tilibo ka taa tilijii.

²Alla ka malamala a la kallankeeyaa* kono le ka bo Siyoni*, saatewo meŋ na ñiiñaa timmata.

³Ǹ na Alla ka naa le, aduŋ a niŋ deyoo nte. Dimbaa saŋaroo le ka mala a ñaatiliŋo la, aduŋ turubaadoo le ka fee a dandaŋo bee la.

⁴A ye saŋo niŋ bankoo kumandi le ka ke seedoolu ti, kaatu a ka naa a la moolu kiitindi le.

⁵A ko, “Ali n na lannamoolu kafu n ye naŋ ñoo ma, mennu niŋ ŋa kambeŋo siti ka bo niŋ beeyaŋ sadaalu* la.”

⁶Saŋ fatoolu ka Alla la tiliŋo kankulaa le, bayiri ate le mu kiitiiteyilaa ti. S

⁷“N na moolu, ali i lamoyi, m be diyaamu la le. Banisirayilankoolu, m be ali tuumi la le. Nte le mu Mansoo ti, ali la Alla.

⁸Ali la beeyaŋ sadaalu maŋ a tinna ŋa ali jalayi de, waraŋ ali ka tu jani sadaalu mennu bondi la n ye.

⁹Nte maŋ suula tuuraa la ali la kooree to, sako ka suula baakotoŋ na ali la baa buŋ to.

¹⁰Sutukono daafeŋolu bee mu nte le taa ti, ka taa konko wuliwuloolu kaŋ beeyaŋolu.

¹¹Kunoolu mennu bee ka yaayoo nte le taa mu ì ti, aduŋ wulakono daafeŋolu bee mu nte le taa ti.

¹²Niŋ konkoo le ye m muta, n te alitolu kaniŋ na, kaatu duniyaa niŋ a konofeŋo bee mu nte le taa ti.

¹³Fo nte ka ninsi subu le domo baŋ, sako ka baa yele miŋ?

¹⁴Ali tenturoo le dii nte Alla la ko sadaa, aduŋ ali ali la laahidoolu timmandi nte Mansa Tallaa ye.

¹⁵Ali n kumandi, niŋ mantooroo naata ali kaŋ, m be ali tankandi la le, aduŋ ali be n horoma la le.”

¹⁶Bari Alla ye ñiŋ ne fo moo kuruŋolu ma ko: “Muŋ ne ye a tinna ali ka n na yaamaroolu fo ali kuŋ fee, waraŋ ka n na kambeŋo fo ali daalu la?

¹⁷Ali ye n na kuluuroo koŋ ne, aduŋ ali ka n na kumoolu fayi le ka ali koo dii ì la.

¹⁸Hani suŋo niŋ ali ye a je, ali niŋ a ka kafuñooyaa le, aduŋ ali niŋ jeenelaalu le ka kuukeñooyaa.

¹⁹Ali daa ka tu kuu jawoo le kaŋ, aduŋ ali neŋo be kalandiŋ neeneeroo le la.

²⁰Ali ka tara kumoolu fo la ali fansuŋ moolu ma le, ka ali faŋolu baadiŋolu koomakuma.

²¹Ali ye ñiŋ kuwolu ke le, m be deyiriŋ, ali ye a miira nte be le ko alitolu. Silaŋ ŋa ali jalayi le, aduŋ ŋa a kuwo laa ali ñaatiliŋo la le.

²²“Wo to, alitolu mennu ka ali ñaa kaasi Alla la, ali ali hakilitu ñiŋ to, niŋ wo nte n si ali faraŋ-faraŋ ko jatoo, aduŋ moo te ali tankandi noo la.

²³Moo meŋ ka tenturoo dii n na sadaa ti, wo maarii ka nte le horoma a ñaama. Moo-wo-moo ka taama sila kendoo la, wo kono nte Alla be a kiisa la le.”