Read Mandinka Jabuuroolu 51 Bible Online

Jabuuroolu 51 - Mandinka bible

Jabuuroolu 51

¹Meŋ be suukuulaa ñaatonkayaa la: Dawuda la Jabuuroo le mu. Tuma meŋ na Annabilayi Natani naata ka a jalayi, biriŋ a niŋ Batiseba ye jeenoo ke. Hee Alla, balafaa n ye, ka bo niŋ i la kanu bambaloo la. I la balafaa warata le, wo kamma la n na junuboolu tuutuu.

²N na kuu jawoolu bee bondi, fo ì ye seneyaa, i ye n seneyandi ka bo n na junuboolu kono.

³Nte ŋa n na boyidaalu loŋ ne, aduŋ n hakiloo ka tu n na junuboolu kaŋ ne.

⁴Ŋa junube kuwo ke ite doroŋ ne la, aduŋ ŋa kuu le ke meŋ jawuyaata i ñaa koto. Wo kamma la i boloota le ka kiitiyo laa n kaŋ, aduŋ i la kiitiyo maŋ sootaari soto.

⁵Nte wuluuta junuboo le kono, ŋa junuboo soto le kabiriŋ m baa ye n konoo taa.

⁶Ite ye konotoseneyaa niŋ tooñaa le kanu, wo kamma la n karandi, ka ñaameŋo ke n sondomoo kono.

⁷N na junuboolu bondi,[13] ŋa seneyaa, n kuu, ŋa koyi fer.

⁸I ye n toñonka ñaa-wo-ñaa, m murundi seewoo niŋ jusulaa kono, ŋa seewoo.

⁹Kana n juubee n na kuu jawoolu kaŋ. N na junuboolu bee tuutuu.

¹⁰Hee Alla, sondome senuŋo daa n kono, i ye n saayindi kuu ka soŋ i ma.

¹¹Kana m bayi i ñaatiliŋo la, aduŋ i kana i la Noora Kuliŋo bondi n kono.

¹²Seewoo dii n na kotenke i la kiisandiroo ka meŋ saabu. M bambandi ka i la kuwo muta n niyo la.

¹³Niŋ wo keta, m be junubelaalu karandi la i la siloolu la le, aduŋ ì be ì faŋ seyi la i ma le.

¹⁴Hee Alla, n na kiisandirilaa, yamfa n na moofaa la, m be i la tiliŋo suukuu la le.

¹⁵Maariyo, m firiŋ fo n si kuma noo, aduŋ m be i jayi la le.

¹⁶Beeyaŋ sadaalu* te i seewondi la, tennuŋ n si ì bondi i ye. I maŋ lafi jani sadaalu la.

¹⁷Ite Alla lafita sadaa meŋ na, wo le mu fammajiyo ti ka bo sondomoo kono. Fammajiyo niŋ tuubi tooñaa be sondomoo meŋ kono, i te balaŋ na wo to.

¹⁸Hee Alla, konotodiyaa yitandi Siyoni* saatewo la, i ye Yerusalaamu tata sansaŋolu seyinkaŋ loo.

¹⁹Niŋ wo keta, i be seewoo la sadaa sootaaribaloolu la le, mennu mu jani sadaalu ti, aduŋ m̀ be ninsituuraalu le bo la sadaa ti, i la sadaajanidulaa* kaŋ.