Read Mandinka Jabuuroolu 55 Bible Online

Jabuuroolu 55 - Mandinka bible

Jabuuroolu 55

¹Meŋ be suukuulaa ñaatonkayaa la: A si laa niŋ kontiŋolu la. Dawuda la Jabuuroo le mu. Hee Alla, i lamoyi n na duwaa la, kana i tuloo faa n na daaniroo ma.

²I lamoyi n na, i ye n jaabi, n na mantooroo ye n jaakalindi le.

³N jawoolu maakaŋo ye n kija bo le, aniŋ moo kuruŋolu la tilimbaliyaa. Ì ka mantooroo le laa n kaŋ. Ì ka kamfaa le tiliŋ n na, fo ì ka boyi n kaŋ.

⁴N kijoo ka sawuŋ n kono le, saayaa silaŋo dunta n na.

⁵Silaŋo niŋ kijafaroo le ye m muta, dewuŋo ye n lamfundi.

⁶N ko m faŋ ma ko, “Niŋ ŋa dampaŋo soto ko puraa, m be tii la le ŋa dahaa soto.

⁷M be tii la le ka taa yereŋ, ŋa taa sabati keñewuloo* kono. S

⁸M be n tariyaa la le ka taradulaa ñini, ka bo foño saŋaroo niŋ turubaadoo kono.”

⁹Hee Maariyo, n jawoolu piwundi, i ye ì fokumoolu duŋ ñoo to. N ka fitinoo le je saatewo kono, aniŋ tilimbaliyaa.

¹⁰Ì ka a muruŋ-muruŋ ne ka a beŋ, suutoo niŋ tiloo. Ì ka a kono bee ke moo boyinkaŋo niŋ moo mantooroo le ti.

¹¹Kasaaroo le ka ke karoo bee la. Tilimbaliyaa niŋ neeneeroo le be faariŋ saatewo bendulaalu to.

¹²A maŋ ke n jawoo ti meŋ ka nendiri kumoolu fo m ma, tennuŋ n si a muña noo le. A maŋ ke n konnantewo ti meŋ ka kibiri n kaŋ, tennuŋ n si a lamfee noo le.

¹³Bari ite le faŋo mu, n niŋ meŋ mu kiliŋ ti, n kafuñoo, n teeri famfaŋo.

¹⁴Ntolu le ka kacaa diimaa ke nuŋ ñoo kaŋ, ǹ niŋ jamaa moolu ka taa ñoo la Alla Batudulaa Buŋo* to.

¹⁵Allamaa n jawoolu ye kere kati, Allamaa ì ye kende saareŋ ka taa laakira. Kaatu kuu jawoo le be ì la taradulaalu kono, aniŋ ì sondomoolu kono.

¹⁶Bari n ka Alla le kumandi, aduŋ ate Yaawe* le be n tankandi la.

¹⁷Soomandaa, tilibuloo, aniŋ suutoo, n ka woosii le, ŋa kumboo a ye, aduŋ a be n kaŋo moyi la le.

¹⁸A be n niyo tankandi la kayira kono le, ka bo m be keloo meŋ kono, kaatu moo jamaa le ka n kele.

¹⁹Alla meŋ be mansasiiraŋo kaŋ fo fawu, be n lamoyi la le, a ye ì ke dooyaa moolu ti, S bayiri n jawoolu balanta le ka ì la siloolu faliŋ. Ì buka sila Alla la.

²⁰N na wo kafuñoo ye a teeroolu boyinkaŋ ne. A ye a la laahidoo tiñaa le.

²¹A fokumoolu ka tara laakuuriŋ ne ko feenewo ka deera ñaameŋ, fitinoo le ka tara a sondomoo kono. A la kumoolu ka tara diyaariŋ ne ko tulu seeralaa, bari ì ka sooroo ke le komeŋ hawusaroo*.

²²I la bataa dunoo tu Yaawe bulu, a be a topatoo la le. A nene te soŋ na ì ye moo tilindiŋolu wutundi ì noo to.

²³Ite Alla le be wo moofaalaalu niŋ neeneerilaalu ñori la kaburoo duuma, janniŋ ì be ì siyo talantewo baluu la. Bari nte de, ŋa n jikoo loo ite le kaŋ.