Read Mandinka Jabuuroolu 58 Bible Online

Jabuuroolu 58 - Mandinka bible

Jabuuroolu 58

¹Meŋ be suukuulaa ñaatonkayaa la: A si laa juloo la ì ka a fo meŋ ye ko, “Kana kasaaroo ke.” Dawuda la Jabuuroo. Fo tooñaa, alitolu maralilaalu,[14] ali ka diyaamu tiliŋo le kaŋ baŋ? Fo ali ka hadamadiŋolu kiitindi niŋ tiliŋo le la baŋ?

²Hanii, ali ka kuu kuruŋolu le siti ali sondomoolu kono. Ali ka fitinoo le taamandi bankoo kaŋ.

³Moo kuruŋolu ka fili le biriŋ ì daa luŋo la, ì ka jenke le ka bo luŋo meŋ na ì wuluuta, ka tara faniyaa foo la.

⁴Ì be faariŋ kunoo le la komeŋ saa, ì ye ì tuloo suki komeŋ biidaa tulu sukiriŋo,

⁵wo meŋ buka saamutalaa kumakaŋo moyi, sako ka i lamoyi saabutiyo la kuma diimaa la.

⁶Hee Alla, ì ñiŋolu kati ì daalu kono. Yaawe*, ñiŋ jatoolu saliŋolu kuntu.

⁷Allamaa ì ye yeemaŋ ko jiyo meŋ ka bori. Allamaa ì la jooraŋolu ye nafantaŋyaa ì buloolu kono.

⁸Allamaa ì ye ke ko musaaliŋo ka yeluŋ namoo ti ñaameŋ, ì ye ke ko bonodiŋo meŋ ñaa nene buka tiloo je.

⁹Alla be ì koora la le, dindiŋolu niŋ keebaalu kafuriŋo, a ye tariyaa ka tambi kaleeroo la kandoo la, ñansaraŋ dimbaa kaŋ.[15]

¹⁰Moo tilindiŋolu be seewoo la le, niŋ ì ye moo kuruŋolu la joo je. Ì si ì siŋolu kuu moo kuruŋolu yeloo kono.

¹¹Moolu si a fo ko, “Jooroo be moo tilindiŋolu ye le. Tooñaa, Alla be jee le, meŋ ka duniyaa kiitindi.”