Read Mandinka Jabuuroolu 59 Bible Online

Jabuuroolu 59 - Mandinka bible

Jabuuroolu 59

¹Meŋ be suukuulaa ñaatonkayaa la: A si laa juloo la ì ka a fo meŋ ye ko, “Kana kasaaroo ke.” Dawuda la Jabuuroo le mu, tumoo meŋ na Sawulu ye kewolu kii ka Dawuda la buŋo kanta ñiŋ kamma la a si a faa. Hee n na Alla, m bondi n jawoolu bulu. N tanka moolu ma mennu ka m boyinkaŋ.

²M bondi kuu jawu kelaalu bulu, i ye n tanka moolu ma mennu ka hame yeleboŋo la.

³A juubee, ì be bitiriŋ n kamma le, ka m faa. Moo saŋaroolu le ye feeroo siti n kamma. Bari Yaawe*, a maŋ ke ko m boyita le waraŋ ŋa junuboo le ke.

⁴A maŋ ke ko ŋa sootaari le soto, fo ì ka bori, ka i paree ka m boyinkaŋ. Wuli, i ye m maakoyi! A juubee baŋ!

⁵Ite Yaawe Alihawaa Maariyo*, ite le mu Banisirayila la Alla ti. Wuli, i ye banku koteŋ moolu jarabi. Kana yamfa moo kiliŋ ye, wo jamfantuŋ jawoolu kono. S

⁶Wulaaroo la, ì ka muru naŋ ì noo to le, ì be hawu-hawu la ko wuloolu, ka saatewo yaayi.

⁷A juubee, ì daa ka kumakaŋolu mennu feenee. Ì daakumoo ka munta le ko muroo, aduŋ ì ka a fo le ko, “Jumaa le be m̀ moyi noo la?”

⁸Bari ite Yaawe ka jele ì la le. Ì jututa banku koteŋ moolu la le.

⁹Ite le mu n semboo ti, n na tankandirilaa. Ite Alla le mu n ye tatoo ti.

¹⁰N na Alla be naa n kaŋ ne, a la kanu bambaloo kamma la. A be n jerindi la n jawoolu la boyoo la le.

¹¹Dukaree Alla, kana ì bee faa ñoo la, niŋ wo nte n na moolu si ñina. Ì janjandi i semboo la, i ye ì boyindi, kooni Maariyo, ǹ na tankandirilaa.

¹²Junube kumoolu le ka tara ì daalu kono. Ì daakumoolu mu junuboo le ti. Allamaa ì la faŋ waroo ye ke ì ye kutindiŋo ti, a ye ì muta. Ì la dankaroolu niŋ ì la faniyaalu kamma la,

¹³ì kasaara niŋ i la kamfaa la, ì ye kasaara, ì noo kana tu. Wo to le duniyaa moolu bee be a loŋ na ko, Alla le be marariŋ Yaakuba koomalankoolu kunna. S

¹⁴Wulaaroo la, ì ka muru naŋ ì noo to le, ì be hawu-hawu la ko wuloolu, aniŋ ka saatewo yaayi.

¹⁵Ì ka yaayi le ko niŋ wuloolu be domori ñiniŋo la, aduŋ ì ka hawu-hawu niŋ ì konoo maŋ faa.

¹⁶Bari nte de, m be suukuwo laa la le ka i semboo la waroo fo. Soomandaa-wo-soomandaa m be i la kanu bambaloo suukuu la santo le, kaatu n na mantoora waatoo kono, i keta n ye tatoo le ti, aniŋ tankadulaa.

¹⁷Kooni Alla, ite le mu n semboo ti, m be suukuwo laa la le ka i jayi, kaatu ite le mu n ye tatoo ti. Ite le ka kanu bambaloo yitandi n na.