Read Mandinka Jabuuroolu 6 Bible Online

Jabuuroolu 6 - Mandinka bible

Jabuuroolu 6

¹Meŋ be suukuulaa ñaatonkayaa la: A si ke kontiŋolu la. Ka bo niŋ kontiŋ julu seyoo la. Dawuda la Jabuuroo le mu. Hee Yaawe*, kana n jalayi i la kamfaa kaŋ, waraŋ ka n kuluu i la diminnaa kaŋ.

²Yaawe, n kendeyandi, kaatu n kuloolu be n dimiŋ kaŋ ne. Balafaa n ye Yaawe, kaatu n kitiita le.

³N niyo faŋo be tooroo le kono. Hee Yaawe, fo janniŋ muŋ tuma?

⁴Sabari Yaawe, n niyo tankandi. N kiisandi i la kanu bambaloo kamma la.

⁵Kaatu moo hakili buka bula noo i la, saayaa kono. Jumaa le si i tentu noo kaburoo kono?

⁶N korita ŋuntaŋo la le. Ŋa n na laaraŋo ke woyoo le ti, n ñaajiyo la. Ŋa n na kullaaraŋo ñikindi, suutoo bee.

⁷Niitooroo ye n ñaa kuyandi le, n ñaa korita le, n jawoolu bee la kuwo kamma la.

⁸Ali bo m bala, alitolu mennu bee ka kuu jawoo ke, kaatu Yaawe ye n kumboo kaŋo moyi le.

⁹Yaawe ye m moyi woosii la le, ka balafaa ñini a bulu. Yaawe ye n na duwaa muta le.

¹⁰Allamaa n jawoolu bee ye malu baake, ì ye jikilateyi. Allamaa ì ye malu waati kiliŋ, ì ye muru ì koo la.