Read Mandinka Jabuuroolu 64 Bible Online

Jabuuroolu 64 - Mandinka bible

Jabuuroolu 64

¹Meŋ be suukuulaa ñaatonkayaa la: Dawuda la Jabuuroo le mu. Hee Alla, i lamoyi n woosiikaŋo la. N tanka n jawoolu la silandiroolu ma.

²N sansaŋ moo kuruŋolu la kullootoo feeroo ma, aniŋ moo jawoolu la beŋo n kamma.

³Ì ka ì neŋolu diyaa le ko hawusaroo*, ì ka kuma jawoolu fayi ko kalabeñoo.

⁴Ì delentoo le ka moo sootaaribaloo buŋ, ì buka sila ka a buŋ katabake.

⁵Ì ka ñoo saayindi kuu jawu kewo la le, ì ka kuma ñoo ye le ì be ì la kutindiŋolu kullootoo laa la ñaameŋ. Ì ka a fo ì faŋ ma le ko, “Jumaa le si ǹ je noo?”

⁶Niŋ ì ye ì la tilimbaliyaa feeroolu dadaa, ì ye a fo ko ì ye feere kendoo le laa. Muna, hadamadiŋo le sondomoo niŋ a hakiloo dibita.

⁷Bari Alla be ì buŋ na a la kalabeñoo la le, ì ye barama tarinke.

⁸Ì neŋolu le be ì takindi la Alla la, ì ye kasaara, aduŋ moolu mennu bee ye ì je, si ì kuŋo jiijaa.

⁹Wo le to moolu bee si sila, ì ye i miira Alla ye meŋ ke, ì ye a la keroolu seyinkaŋ.

¹⁰Moo tilindiŋolu ye seewoo Yaawe* la kuwo la, ì ye i tuuku a la. Tiliŋo be moolu mennu sondomoo to, ì bee si a jayi.