Read Mandinka Jabuuroolu 65 Bible Online

Jabuuroolu 65 - Mandinka bible

Jabuuroolu 65

¹Meŋ be suukuulaa ñaatonkayaa la: Dawuda la Jabuura suukuwo le mu. Hee Alla, jayiroo ñanta i ma Siyoni* saatewo kono le, aduŋ ǹ ñanta ǹ na laahidoolu timmandi la i ye le.

²Moolu bee be naa ite le kaŋ, kaatu ite le ka duwaa jaabi.

³Niŋ tuma meŋ ǹ na kuu jawoolu dunoo kuliyaata ǹ kaŋ, i ka yamfa ǹ na junuboolu la le.

⁴Seewoo be moo le ye i ye meŋ tomboŋ ka a katandi i la, ka sabati i la luwo to. I Batudulaa Buŋo* kuu kendoolu be ǹ wasa la le, meŋ mu i la buŋ senuŋo neemoo ti.

⁵Hee Alla, ǹ na kiisoo sababoo, i ka ǹ na duwaalu jaabi le ka bo niŋ kaawakuwolu la, ka ǹ tankandi. Ite le mu duniyaa moolu bee jikiraŋo ti, hani mennu be siiriŋ fankaasoolu daŋo to.

⁶Ite le ye konkoolu londi i semboo la, kaatu semboo be ite le bulu.

⁷I ye fankaasoolu la bumbuŋo tenkundi le, aniŋ ì jiibaliŋolu maakaŋo, i ye banku koteŋ moolu la maakaŋ baa tenkundi le.

⁸Wo kamma la duniyaa fannaalu bee la, moolu kijoo ka ì fara i la kaawakuwolu la le. Ka bo tilibo ka taa fo tilijii i la keroolu ka seewoo suukuwo dundi moolu la.

⁹I ka kaayaa bankoo ye le ka samaajiyo jindi a kaŋ, i ka a yiriwandi kendeke le. Ite Alla la jiibuŋo be faariŋ ne tep. Ite le ka siimaŋolu falindi bankoo kaŋ, i ye a kuwo laa wo le ñaama.

¹⁰I ka samaajiyo kupindi bankoo kaŋ ne ka baliŋolu denkundi. I ka bankoo montondi samaajii wisiwisoolu le la ka fiifeŋolu barakandi.

¹¹I la beteyaa kaŋ, i ka bankoo tibandi siimaŋ katiriŋolu le la. I la sareeti siloolu kaŋ ka tara burunturiŋ bankoo neemafeŋolu le la.

¹²Beeyaŋ daañini dulaa ka tara tibariŋ ñaamoo le la. I ka konkoolu dandaŋo bee seewondi le.

¹³Saajiyolu ka tara faariŋ kenoolu kono le, i ye wulumbaŋolu bee kono ke siimaŋolu ti. Feŋo bee ka tara seewooriŋ ne, ì ka ì kaŋo bula ñoo la ka suukuwo laa.