Read Mandinka Jabuuroolu 68 Bible Online

Jabuuroolu 68 - Mandinka bible

Jabuuroolu 68

¹Meŋ be suukuulaa ñaatonkayaa la: Dawuda la Jabuura suukuwo le mu. Allamaa Alla ye wuli, a ye a jawoolu janjandi. Allamaa a konnantewolu ye i bori a ñaato.

²Ko foñoo ka siisiyo tindi taariŋ ñaameŋ, Allamaa a ye ì bayi wo ñaama. Ko dimbaa maloo ka kaañoo yeluŋ ñaameŋ, Allamaa moo kuruŋolu ye kasaara Alla ñaatiliŋo la wo ñaama.

³Bari Allamaa moo tilindiŋolu ye jusulaa aniŋ ka seewoo Alla ñaatiliŋo la. Allamaa ì ye kontaani burayi.

⁴Ali suukuwolu laa Alla ye, ali jayiri suukuwolu laa a too la. Ali suukuwo wulindi a ye, ate meŋ ka tara tawaloolu kaŋ ka ì borindi. A too mu Yaawe* le ti, ali seewoo a ñaatiliŋo la.

⁵Alla be a taradulaa senuŋo kono le, ate le mu aliyatiimoolu faamaa ti, aniŋ furuyaamusoolu la kiitiiteyilaa.

⁶Alla le ka kiideetoo dimbaayandi. Ate le ka mutamoolu firiŋ, a ye ì yiriwandi burayi. Bari balannaalu, wolu be tara la siiriŋ banku jaariŋo le kaŋ.

⁷Kooni Alla, tuma meŋ i tambita i la moolu ñaato, tuma meŋ i taamata ì fee keñewuloo* kono, S

⁸bankoo jarajarata le, saŋ fatoolu ye samaajiyo jurumi, ite Sinayi Konkoo la Alla naatoo naŋ, ite Alla, Banisirayila la Alla ñaatiliŋo la.

⁹Hee Alla, i ye samaajii fuumariŋo le jindi. I ye i la moolu la keetaabankoo murundi firiŋo kono le kabiriŋ a be koririŋ.

¹⁰I la moolu ye jee ke ì siidulaa ti le. Hee Alla, i la beteyaa kaŋ, i ye diiroo ke fentaŋolu la le.

¹¹Maariyo la yaamaroo kaŋ, musu jamaalu ye kibaaroo samba ko:

¹²“Mansoolu be bori kaŋ ne, ì niŋ ì la kelediŋ kafoolu be bori kaŋ ne!” Musoolu be buusi feŋolu talaa kaŋ suu le.

¹³Alitolu doolu ye ali faŋolu yeebu kuu saajii koorewolu kono ñaa-wo-ñaa, Banisirayila puraamaa ñarandita kodiforoo le la, a dampaŋolu ñarandita saniforoo la.

¹⁴Tuma meŋ Alla Tallaa ye mansoolu janjandi bankoo kaŋ, a ka munta niŋ komboo feeneeta[17] Salimoni Konkoo kaŋ.

¹⁵Hee Basani Konkoo, landafarasa konko. Hee Basani Konkoo, i niŋ i turu jaŋolu.

¹⁶Hee Konko, i niŋ i turu jaŋolu, muŋ ne ye a tinna i ka Siyoni* Konkoo fele kiiliyaa kaŋ, Alla lafita daameŋ ye ke a taradulaa ti, Yaawe be tara la daameŋ to fo abadaa?

¹⁷Maariyo bota naŋ Siyoni Konkoo to, a niŋ a la keleraŋ sareeti* wuli dambaloolu, ka duŋ a Batudulaa Senuŋo kono.

¹⁸Ite Maariyo, i taata konko jaŋo santo le. I taatoo ye mutamoolu samba. I ye moolu la buuñaa soorifeŋolu muta le, hani mennu balanta i la sabatoo la jee.

¹⁹Tentoo be Maariyo ye, meŋ buloo ka tara ǹ koto luŋ-wo-luŋ. Alla le ka ntolu kiisa. S

²⁰Ntolu la Alla mu Alla le ti meŋ ka kiisandiroo ke. Ate Yaawe, m̀ Maariyo le ka ntolu kanandi saayaa ma.

²¹A be koyiriŋ ne ko, Alla be a jawoolu kuŋolu teyi la le, wo kuŋ ñandiŋolu, mennu ka tu ì la junube siloolu kaŋ.

²²Maariyo ko, “M be n jawoolu murundi la le ka bo Basani. M be ì murundi la le ka bo fankaasoo duumoolu to.

²³Bituŋ ali si ali siŋolu kuu yeloo kono, hani ali la wuloolu faŋolu si ì niyo soto jee.”

²⁴Kooni Alla, moolu taamata ñoo nooma le, ka i la kuwo juura, ka taama ñoo nooma n na Alla, n na Mansa ye, ka duŋ i Batudulaa kono.

²⁵Suukuulaalaalu be ñaato, kumafeŋ kosilaalu be kooma, sunkutoolu be teema, ì be tambuuroolu kosi kaŋ, ka suukuwo laa ko,

²⁶“Ali Alla tentu ali la jamaa beŋo to. Alitolu Banisirayila bonsuŋo moolu, ali Yaawe tentu.”

²⁷Benjamini fele ñaato, lasiloo meŋ dooyaata ì bee ti, wolu koolaa Yahuuda maralilaalu niŋ ì la kafoolu, ka taa Sebuluni lasiloo niŋ Nafutali lasiloo maralilaalu.

²⁸Kooni Alla, i la semboo yitandi, i ye semboo meŋ taamandi ntolu ye,

²⁹ka bo i Batudulaa to Yerusalaamu, mansoolu ye soorifeŋolu dii i la daameŋ.

³⁰Ñiŋ bantala banku* jawoolu jarabi. Ñiŋ daafeŋolu[18] mennu be sabatiriŋ seyiŋolu kono, ñiŋ tuuraalu mennu be ninsiriŋ sembentaŋolu kono. Mennu ka ǹ kaniŋ naamoo la, ì dori duuma. Banku moolu janjandi mennu ka kontaani keloo la.

³¹Misira bankoo ye jaawaloo samba naŋ, Kusi* bankoo ye i tariyaa ka naa a bulufeŋo tiliŋ Alla la.

³²Alitolu duniyaa mansamarali bankoolu, ali suukuwo laa Alla ye, ali jayiri suukuwolu laa Maariyo ye. S

³³Ali a laa ate ye, meŋ ka taama saŋ fatoolu kaŋ, mennu daata biriŋ foloodulaa to. A moyi baŋ, a ye a kumakaŋo bumbundi le, a la kumakaŋ sembemaa.

³⁴Ali sembe waroo fo Alla doroŋ ma. Ate le mu Mansa horomariŋo ti Banisirayila kunna. Minaayoolu ka a la semboo yitandi le.

³⁵Kooni Alla, i ñaasilaŋo warata i batudulaa kono le. Banisirayila la Alla le ka semboo niŋ fankoo dii a la moolu la. Tentoo be Alla ye.