Read Mandinka Jabuuroolu 69 Bible Online

Jabuuroolu 69 - Mandinka bible

Jabuuroolu 69

¹Meŋ be suukuulaa ñaatonkayaa la: A si laa juloo la ì ka a fo meŋ na ko “Firoolu.” Dawuda la Jabuuroo le mu. Hee Alla, m bondi bataa kono, jiyo ye n kunuŋ ne fo n kaŋo to.

²M be kunuŋ kaŋ potoo mereŋo le kono tuku te daameŋ. M bulata jii diinondiŋo le kono, aduŋ jiibaliŋolu le ka sele n kaŋ.

³N korita wuuroo la le, fo n kaŋ konotoo jaata, n ñaalu dibita m ma kut, feŋ te fo n ka n na Alla la maakoyiroo meŋ batu.

⁴Moolu mennu ye n koŋ, daliila te a la, ì yaatewo le siyaata hani n kuntiña kesoolu ti. N jawoolu ka faniyaa le fo m ma, ì semboo warata le, aduŋ ì lafita le ka m faa. Ì ka n joorindi feŋolu le la m maŋ mennu nakari.

⁵Hee Alla, ite ye nte la jenkoo loŋ ne. N na boyidaalu maŋ nukuŋ i ma.

⁶Hee Yaawe* Alihawaa Maariyo*, kana soŋ nte la kuwo ye a tinna moolu mennu ye ì jikoo loo i kaŋ, ì ye bula maloo kono. Hee Banisirayila la Alla, kana soŋ n na kuwo ye moolu bulandi jutunnayaa kono, mennu ka i ñini.

⁷Ite le la kuwo ye nendiroo saabu m ma, maloo doroŋ ne tarata n kaŋ.

⁸N keta m fansuŋ moolu ye luntaŋo ti, n keta m baadiŋolu ye tumarankewo ti.

⁹Ŋa hamoo meŋ soto i Batudulaa Buŋo* la kuwo to, a ka mala n kono le ko dimbaa, aduŋ moolu mennu ka i neŋ, ì la nendiroolu ka laa nte le kaŋ.

¹⁰Tuma meŋ n suntoo kumboota, moolu ka n neŋ.

¹¹Tuma meŋ ŋa booto funtoolu duŋ ka n na niikuyaa yitandi, ì ye n ke jelefeŋo ti.

¹²Ì ye n ke kacaaraŋo le ti saatewo dundaŋ daa* to, aduŋ dolominnaalu ka denkiloolu laa le ka n teeliŋ.

¹³Hee Yaawe, nte de, n na duwaa be looriŋ ite le kaŋ. Hee Alla, n na duwaa jaabi waatoo la, i faŋo ye meŋ londi. N jaabi i la kanu bambaloo la waroo la. N jaabi niŋ i la tankandiri koyoo la.

¹⁴N tanka n kana tuuneŋ potoo mereŋo kono. N tanka n jawoolu ma, aniŋ jii diinondiŋo kono.

¹⁵Kana jiibaliŋolu bula ì ye sele n kaŋ, waraŋ diinoŋo ye n kunuŋ, waraŋ kaburoo ye tawuŋ m fee.

¹⁶Hee Yaawe, n jaabi i la kanu bambaloo niŋ i la beteyaa kaŋ. Ka bo niŋ i la balafaa baa la, muru n kaŋ.

¹⁷Nte mu i la dookuulaa le ti, kana i faŋ maabo m ma. Nte be mantoora baa le kono, n jaabi katabake.

¹⁸Kata n na, i ye m bondi, i ye m firiŋ n jawoolu bulu.

¹⁹Ite ye a loŋ ne nendiroo meŋ keta n na, aniŋ m bulata maloo niŋ horomantaŋyaa meŋ kono. Ite ye nte jawoolu bee loŋ ne.

²⁰Nendiroolu ye n kijoo teyi le, fo n jikilateyita. N jikita le ko m be balafaa daa soto la le, bari a maŋ soto, aniŋ sabarindilaalu, bari ì maŋ soto.

²¹Ì ye kunoo le ke n ye domoroo to. Biriŋ mindoo ye m muta, ì ye bineekaroo* le dii n na ka a miŋ.

²²Allamaa ì la domori beŋo taabuloo ye kupi ì kaŋ komeŋ papewo, ì ka sadaalu* mennu bo ka ì domo, a ye ke ì ye kutindiŋo ti.

²³Ì ñaalu dibindi fo ì kana jeroo ke noo, i ye tu ì teesuroolu lamfundi la.

²⁴I la kamfaa jindi ì kaŋ, i ye ì ñankoŋ i la jusukandoo la.

²⁵Allamaa ì la daakaalu ye tumbuŋ, moo kana tu sabatiriŋ ì la tiriliisoolu* kono.

²⁶Bayiri ì ka moolu toorandi le, ite ye mennu jarabi fokabaŋ, ka moolu la mantooroo jumbundi, i ye mennu lanjuuru.

²⁷Ì la junuboolu dunoo lafaa ì ye, ì kana i la kiisoo soto.

²⁸Allamaa ì toolu ye tuutuu baluwo kitaaboo kono. Allamaa ì niŋ moo tilindiŋolu kana safee ñoo la.

²⁹Bari nte be mantooroo le kono, aniŋ dimiŋo. Hee Alla, m bondi ka bo niŋ i la kiisandiri semboo la.

³⁰M be Alla too jayi la niŋ suukuwo le la, m be a la waroo fo la le, ka bo niŋ tenturoo la.

³¹Wo le be Yaawe seewondi la ka tambi a ye ninsi sadaa la, hani ninsituuraa niŋ a binoo niŋ a worosoolu.

³²Moo bataariŋolu, ali a juubee, ali ye jusulaa, moolu mennu ka Alla ñini si jiki ì sondomoo kono.

³³Yaawe ka i lamoyi moolu la le mennu be sotobaliyaa daa to, aduŋ a buka a ñaa kaasi a la moolu la, mennu be mutoo kono.

³⁴Saŋ fatoolu niŋ bankoo, ali Alla jayi. Fankaasoo aniŋ niilamaa feŋolu mennu bee be a kono, ye a jayi.

³⁵Alla be Siyoni* kiisa la le, aduŋ a be Yahuuda saatewolu seyinkaŋ loo la le. A la moolu be sii la jee le, a ye ke ì taa ti.

³⁶A la moolu koomalankoolu le be jee keetaa la, aduŋ moolu mennu ye a kanu, wolu le be sii la jee.