Read Mandinka Jabuuroolu 71 Bible Online

Jabuuroolu 71 - Mandinka bible

Jabuuroolu 71

¹Hee Yaawe*, m bambuta ite le kooma, kana soŋ ŋa malu muumeeke.

²N tankandi i la tiliŋo kaŋ, i ye n kanandi. I tuloo loo n na, i ye n kiisa.

³Ke n ye semberaŋ beroo ti, aniŋ tata bambandiŋo, ka n kiisa, kaatu ite le mu n na tuukuraŋo ti, aniŋ n na tatoo.

⁴Hee Alla, m bondi moo kuruŋolu bulu, ka bo moo jawoolu niŋ tilimbaloolu la maroo to.

⁵Maariyo, n jikoo mu ite le ti. N dankeneyaata ite Yaawe le la biriŋ n dindiŋ.

⁶N jikita ite le la ka bo n wuluu waatoo la. Ka bo tuma meŋ m be m baa wuluuñaŋo kono, i ye n hati le. M be tu la i jayi la le.

⁷N na baluwo keta moo jamaa le ye kawandoo ti, kaatu ite le mu n na tuukuraŋ bambandiŋo ti.

⁸N daa ka tu i jayoo le kaŋ, aniŋ ka i horoma waati-wo-waati.

⁹Kana m bayi i bala n kotooriŋo la. Kana m bula n semboo bandiŋo la.

¹⁰N jawoolu ka kumoolu fo m ma le, mennu be n niyo ñini kaŋ, ì tafawuta n kamma le,

¹¹ka a fo ko, “Alla ye a bula le. Ali ŋà a bayindi, ŋà a muta, bayiri moo te a kanandi noo la.”

¹²Hee Alla, kana jamfa n na. N na Alla, naa tariyaake ka m maakoyi.

¹³Allamaa n niyo toorandilaalu ye bula maloo kono, ì ye kasaara. Allamaa mennu ka a kata ka m mantoora, ì ye bula maloo niŋ jutunnayaa kono.

¹⁴Bari nte de, m be n jikoo tu la looriŋ i kaŋ ne, aduŋ m be jayiroo lafaa la i ye le.

¹⁵M be kali kuu kendoolu seyinkaŋ na le, i ye mennu ke tiloo muumewo bee, ka a fo i ye i la moolu kiisa ñaameŋ, wo kuwolu yaatewo tambita n na londoo la ñaa-wo-ñaa.

¹⁶Kooni Maarii Yaawe, m be i jayi la i la keroolu la waroo kaŋ ne. M be ite doroŋ ne la tiliŋo kankulaa la.

¹⁷Hee Alla, i ye n karandi le biriŋ n dindiŋ, aduŋ ka naa fo saayiŋ na, n ka i la kaawakuwolu seyinkaŋ ne.

¹⁸Hee Alla, hani n kotooriŋo la, n kuntiñoo koyita ñaa-wo-ñaa, kana i bo n to, fo niŋ ŋa i la waroo niŋ i la semboo seyinkaŋ jamaani naalaalu ye.

¹⁹Kooni Alla, i la tiliŋo nakita saŋ fatoolu la le. I ye kaawakuu baalu le ke. Doo koteŋ te jee komeŋ ite Alla.

²⁰I ye bataa baa niŋ mantooroo laa n kaŋ ne, bari i be muru la le i ye m bambandi, ka m bondi saayaa daa to, i ye m murundi baluwo to kotenke.

²¹I be n na buuñaa lafaa la le, aniŋ ka n jusulandi kotenke.

²²Kooni Alla, wo to le m be i jayi la niŋ kooraa la, kaatu i tilinta le. M be suukuwo laa la le ka i jayi niŋ kontiŋo la, ite Banisirayila la Senuŋ Baa.

²³M be suukuwo laa la santo niŋ seewoo le la, ka i jayi. N seewoota le, kaatu i ye n niyo kumakaa le.

²⁴I ye tiliŋo meŋ yitandi n na, m be tu la a seyinkaŋ na le, kaatu i ye moolu bulandi maloo niŋ jutunnayaa kono le, mennu ye a kata ka m mantoora.