Read Mandinka Jabuuroolu 74 Bible Online

Jabuuroolu 74 - Mandinka bible

Jabuuroolu 74

¹Asafu la suukuwo. Hee Alla, muŋ ne ye a tinna i ye i koo dii ntolu la fo fawu? Muŋ ne ye a tinna i jusoo kandita i faŋo la saajii koorewo kamma, i mu mennu kantalaa ti?

²I miira i la moolu la, i ye mennu tomboŋ waati jaŋ koomanto, i la moolu, lasiloo i faŋo ye meŋ kumakaa. I hakiloo ye bula Siyoni* Konkoo la, i ye daameŋ ke i taradulaa ti.

³Wuli, i ye naa ñiŋ tumbuŋ meeriŋo kono muruŋ-muruŋ. A juubee, ǹ jawoolu ye Batudulaa feŋolu bee le tiñaa.

⁴I jawoolu ye wuuroo kumandi i Batudulaa Senuŋo kono le. Ì ye ì la bandeeroolu londi jee le,

⁵ì ye teeraŋolu le teeka naŋ, komeŋ mennu ka naa sutu teyoo la. Ì ye a dundaŋ daalu sepu ka ì boyi.

⁶Ì niŋ ì la teeraŋolu niŋ maritoolu, ì ye a babara leseriŋolu faraŋ-faraŋ ne.

⁷Ì ye i Batudulaa boyi le, ì ye a jani fo a nakita bankoo la. Ì ye i taradulaa kosondi le, i too be meŋ kunna.

⁸Ì kumata ì faŋ ma le ko, “M̀ be ì muumewo kasaara la le.” Ì ye Alla batudulaalu bee le jani bankoo kaŋ.

⁹Alla la kaawakuwolu taamanseeroolu maŋ naa ntolu ye. Annabiyomu kiliŋ maŋ tu ǹ kono kotenke, aduŋ moo te ǹ kono meŋ ye ñiŋ kuwo baŋ waatoo loŋ.

¹⁰Hee Alla, janniŋ muŋ tuma le ǹ jawoolu be tara la i ñaawali la? Fo ì be tu la i neŋ na le baŋ fo fawu?

¹¹Muŋ ne ye a tinna i ye i maakoyiri buloo bo ǹ koto? Dukaree Alla, i bulu sembemaa bula naŋ i ye ǹ jawoolu kasaara.

¹²Hani wo, ite Alla le mu ǹ na Mansoo ti, kabiriŋ waati jaŋ koomanto. I ka kiisoo naati ǹ ye duniyaa kono le.

¹³Ite le ye jiyo talaa fula ti ka bo niŋ i semboo la, i ye baakono daafeŋ baalu kuŋolu teyi.

¹⁴Ite le ye daafeŋ Lefiyatani[19] kuŋolu teyi, i ye a suboo dii keñewuloo* daafeŋolu la domoroo ti.

¹⁵Ite le ye woyoolu niŋ boloŋolu ñaapuuloolu fetendi, i ye boloŋ jaabaloolu jandi le.

¹⁶Suutoo niŋ tiloo mu ite le taa ti, ite le ye karoo niŋ tiloo daa.

¹⁷Ite le ye bankoo naanewolu londi. Ite le ye samaa niŋ tilikandoo londi.

¹⁸Hee Yaawe*, i miira i jawoolu ka ñaawaliroo meŋ ke i la, wo toolewolu ka nendiroo meŋ ke i la.

¹⁹Kana i la puraa[20] niyo dii ñiŋ daafeŋ saŋaroolu la, kana ñina i la moo toorariŋolu la fo fawu.

²⁰I la kambeŋo la kuwo juubee. Bankoo dulaa dibiriŋolu bee be faariŋ fitinoo le la.

²¹Kana soŋ sembentaŋolu ye bula malu kuwo kono. Fentaŋolu niŋ moo bataariŋolu deemaa, fo ì si i jayi i too la.

²²Hee Alla, i faŋo ye wuli i ye i la kuwo makatoo bayi. I miira toolewolu ka tu i ñaawali la ñaameŋ waati-wo-waati.

²³Kana i jawoolu tu ì la kibiroo kaŋ, ì ka tu wuuroolu mennu ke la i kamma.