Read Mandinka Jabuuroolu 77 Bible Online

Jabuuroolu 77 - Mandinka bible

Jabuuroolu 77

¹Meŋ be suukuulaa ñaatonkayaa la: Yedutuni tooyaa la, Asafu la Jabuuroo le mu. Ŋa n kaŋo bula le ka kumboo Alla ye, n wuurita fo a si i lamoyi n na.

²Tuma meŋ m be mantooroo kono, ŋa Maariyo le ñini, ŋa m buloolu wulindi le ka duwaa suutoo bee, m maŋ kori, aduŋ n niyo maŋ laa noo.

³Niŋ ŋa m miira Alla la, n ka kumboo le, niŋ ŋa n hakiloo duŋ, n ka jikilateyi le. S

⁴Hee Alla, i ka n ñaalu bali biti la le suutoo. N jaakalita le fo m buka diyaamu noo.

⁵Ŋa m miira kunuŋ tiloolu la beteyaa le la, n hakiloo muruta sanji jamaa koomanto,

⁶tuma meŋ n ka suutoo bee ke seewoo niŋ suukuulaa ti. N ka n hakiloo duŋ ne, ka m miira wo niŋ saayiŋ fatata ñaameŋ.

⁷Fo Maariyo be tu la i kuntu la ǹ na le baŋ? Fo a te hiina la ǹ ye kotenke baŋ?

⁸Fo a ye i foño le ka a la kanu bambaloo yitandi ǹ na fo fawu? Fo a te a la laahidoolu timmandi la ǹ ye kotenke?

⁹Fo Alla ye i foño le ka hiinanteeyaa baŋ? Fo a la kamfaa le ye a tinna a maŋ balafaa soto ǹ ye baŋ? S

¹⁰Bituŋ n naata a fo ko, “N na dimiŋ kuwo faŋo mu ñiŋ ne ti ko, Alla Mansa Tallaa ye a buloo bo ǹ koto.”

¹¹Yaawe*, m be n hakiloo murundi la i la kuu baalu kaŋ ne, ka m miira kaawakuwolu la i ye mennu ke koomanto.

¹²M be n hakiloo loo la kuwolu bee kaŋ ne i ye mennu ke, m be kali m miira la kuu baalu la le i ye mennu ke.

¹³Kooni Alla, i ye kuu-wo-kuu ke a jankuta le. Alla koteŋ te keriŋ meŋ warata ko ite.

¹⁴Ite le mu Alla ti meŋ ka kaawakuwolu ke. I ye i semboo la waroo lankenemayandi duniyaa moolu ma le.

¹⁵I ye i la moolu kiisa i la semboo la le, Yaakuba aniŋ Yusufa koomalankoolu. S

¹⁶Kooni Alla, biriŋ baajiyolu ye i je ì silata le, fankaasoo diinoŋñaalu jarajarata le.

¹⁷Tawaloolu ye sanjoo soo, saŋ feteŋo kumata naŋ santo, saŋ ŋalasoo kalabeñemaa ŋalasita karoo bee la.

¹⁸I la saŋ feteŋo birimintinta naŋ, i la saŋ ŋalasoolu ye duniyaa fanundi. Bankoo jarajarata ka jiijaa.

¹⁹I ye i la siloo bondi baa teema la, i ye i taamadulaa ke diinoŋñaalu teema, bari moo maŋ i siŋ noolu je noo.

²⁰I ye i la moolu kenkeŋ ne komeŋ koorewo, i ye ì la kuwo duŋ Musa niŋ Haaruna le bulu.