Read Mandinka Jabuuroolu 78 Bible Online

Jabuuroolu 78 - Mandinka bible

Jabuuroolu 78

¹Asafu la suukuwo. N na moolu, ali i lamoyi n na karandiroo la, ali ye ali tuloo loo n daakumoolu la.

²M be mansaaloolu le fo la, aduŋ m be kuu maaboriŋolu le kotoo firiŋ na ka bo naŋ koomanto,

³ŋà kuwolu mennu moyi, ŋà ì loŋ, m̀ mumuñolu ye mennu saata ǹ ye.

⁴Ǹ te ì maabo la ǹ diŋolu ma, m̀ be ì fo la jamaani naalaa ye le, meŋ keta Yaawe* la baara kuu ñiimaalu ti, a la semboo, aniŋ a ye kaawakuwolu mennu ke.

⁵Alla ye luwaalu le dii Yaakuba koomalankoolu la, a ye yaamaroolu le dii Banisirayilankoolu la. A ye m̀ mumuñolu yaamari le ka ì diŋolu karandi wolu la,

⁶ñiŋ kamma la jamaani naalaa dindiŋolu, mennu be naa wuluu la, si ì karaŋ, itolu fanaa ye muru ì ye ì diŋolu karandi ì la.

⁷Wo si a tinna ì ye ì jikoo loo Alla kaŋ, ì hakiloo te bo la kuwolu kaŋ a ye mennu ke, ka a la yaamaroolu muta.

⁸Wo be a tinna le ì te ke la ko ì mumuñolu, wolu mennu mu kanjaaroolu ti, aniŋ balannaalu. Ì keta moolu le ti dankeneyaa te mennu sondomoo to, foroyaa te ì kono Alla la kuwo to.

⁹Efurayimu* lasiloo taamaayaata kalandiŋolu la ñaa-wo-ñaa, keloo luŋo la ì borita le.

¹⁰Ì maŋ kambeŋo muta ì niŋ Alla teema, ì maŋ soŋ a la yaamaroolu muta la.

¹¹Ì ñinata le a ye kuwolu mennu ke, a ye kaawakuwolu mennu yitandi ì la.

¹²Ì mumuñolu ye a je le a ye kaawakuwolu mennu ke Sowani kene fanuŋolu kono, Misira bankoo kaŋ.

¹³Alla ye baa fara le ka ì tambindi a teema la. A ye baajiyo moolondi le, a loota komeŋ sansaŋo.

¹⁴Tiloo waatoo la a ka tambi ì ñaato niŋ minaayoo le la, suutoo a ka tara ì fee niŋ dimbaa maloo la.

¹⁵A ye beroo fara keñewuloo* kono le, a ye jiyo dii a la moolu la jee ka bo ñaapuuloolu kono, bankoo duuma.

¹⁶A ye woyoo bondi beroo kono le, a ye jiyo borindi komeŋ boloŋo.

¹⁷Hani wo, ì tententa le ka junube kuwolu ke Alla la, ka balaŋo tiliŋ Mansa Tallaa la keñewuloo kono.

¹⁸Ì ye Alla kotobo le ì la tawunteeyaa kaŋ, biriŋ ì ye domoroo kaniŋ meŋ ye ì meeyaa.

¹⁹Ì ye Alla sooki le ka a fo ko, “Fo Alla si domoroo dii noo ntolu la keñewuloo kono baŋ?

²⁰Tooñaa le mu, a ye beroo lipa le jiyo fintita, jiyo borita komeŋ woyoo, bari fo a si mbuuroo fanaa dii noo ntolu la baŋ, a la moolu, waraŋ ka suboo dii ǹ na?”

²¹Alla ye ì moyi tuma meŋ na, a kamfaabaata le. A ye dimbaa jindi Yaakuba koomalankoolu kaŋ, a la kamfaa lafaakuuta Banisirayilankoolu kamma,

²²kaatu ì maŋ dankeneyaa Alla la, ì maŋ laa ko a si tankoo dii noo ì la.

²³Hani wo, a ye saŋ fatoolu yaamari le, a ye Arijana bundaalu yele,

²⁴a ye manna* mbuuroo sanji kese buruntu ì ye le, a ye Arijana siimaŋo le dii ì la ka a domo.

²⁵Hadamadiŋolu ye malaayika domoroo domo, Alla ye domoroo fuumariŋo le dii ì la.

²⁶A ye foñoo le boyindi ka bo saŋo santo, tilibo kara maafaŋo la. Ka bo niŋ a la semboo la, a ye foñoo bondi naŋ bulubaa kara maafaŋo la le.

²⁷A ye kunu suboo le buruntu ì ye, meŋ siyaata komeŋ bankumunkoo.

²⁸A ye ì joloŋ ì la daakaa kono le, ì la tiriliisoolu* dandaŋo bee la.

²⁹Bituŋ ì ye domoroo ke fo ì konoolu faata. Meŋ ye ì meeyaa, Alla ye a dii ì la le.

³⁰Bari ì be domoroo la tuma meŋ na, janniŋ ì ka ì la meeyaa bo,

³¹Alla kamfaabaata Banisirayilankoolu kamma le, a ye ì la kee bambandiŋolu faa, mennu be fondinkeeyaa daa to.

³²Ñiŋ bee ñaa-wo-ñaa, moolu tententa le ka junuboo ke. A la kaawakuwolu maŋ a tinna ì ye laa a la.

³³A ye ì la baluwo ke kenseŋ ne ti, ka ì kasaara loodulaa kiliŋ.

³⁴Niŋ a ye doolu faa ì kono, toomaalu ka muru a kaŋ ne, ì ka tuubi soobeeke le, ka ì ñaa tiliŋ Alla la.

³⁵Ì hakiloo ka bula le ko Alla le mu ì la semberaŋ beroo ti, ko Alla Mansa Tallaa le mu ì kumakaalaa ti.

³⁶Bari ì ka neeneeri kumoolu le fo a ye ì daalu la, aniŋ ka faniyaa fo a ye.

³⁷Ì sondomoo maŋ bambaŋ a la kuwo to. Ì maŋ a niŋ ì teema kambeŋo muta kendeke.

³⁸Hani wo, ate ye balafaa soto ì ye le. A yamfata ì la junuboolu la le, a maŋ ì kasaara. A ka muña a la kamfaa kaŋ ne siiñaa jamaa, a buka a fijoo jindi ì kaŋ.

³⁹Kaatu a ye a loŋ ne ko ì mu hadamadiŋolu doroŋ ne ti, ì munta le ko foñoo meŋ ka fee, a ye tambi, a te muru la naŋ fereŋ.

⁴⁰Ì ye balaŋo le tiliŋ a la keñewuloo kono siiñaa jamaa, ka a niyo kuyandi jee.

⁴¹Ì ye a kotobo le, ì ye a seyinkaŋ-seyinkaŋ, ka Banisirayila la Senuŋ Baa kamfandi.

⁴²Ì ñinata a la semboo la le, aniŋ luŋo meŋ a ye ì bondi ì jawoolu bulu,

⁴³tuma meŋ a ye kuu baalu ke Misira bankoo kaŋ, aniŋ a ye kaawakuwolu mennu ke Sowani kene fanuŋo kono.

⁴⁴A ye Misirankoolu la baajiyolu yelemandi yeloo le ti, ì maŋ mindaŋ jii soto.

⁴⁵A ye sii koorewolu le naati ì kaŋ, aduŋ wolu ye ì ŋayibe le, aniŋ totoolu mennu ye ì toora.

⁴⁶A ye ì la siimaŋolu dii tumboolu la, ka ì la doofeŋo ke kuntiŋolu taa ti.

⁴⁷A ye ì la wayini* yiroolu kasaara samberoolu le la, ka ì la sooto suŋolu kasaara waamoo la.

⁴⁸A ye ì la ninsoolu faa samberoolu le la, ka ì la beeyaŋolu faa saŋ feteŋo la.

⁴⁹A la kamfaa, diminnaa, jusukandoo, aniŋ niitooroo, a ye wolu le kafu ñoo ma, a ye malaayikoolu kii, ka moolu kasaara.

⁵⁰Alla ye a la kamfaa fijoo jindi le, a maŋ ì tu ì niyo la. A ye alibalaa kuuraŋo le jindi ì kaŋ.

⁵¹A ye Misirankoolu[21] la konoñaa foloolu bee le faa, ì ye mennu wuluu biriŋ ì be ì la fondinkeeyaa daa to.

⁵²Wo koolaa a naata a la moolu saajiimaalu tambindi, a ye ì kenkeŋ keñewuloo kono la.

⁵³A ye ì samba tankoo le kono, ì maŋ sila, bari ì jawoolu, baa le ye wolu domo.

⁵⁴Bituŋ a ye ì samba naŋ a la banku jankuriŋo to, konkoo to, a ye meŋ taa a faŋo dammaa semboo la.

⁵⁵A ye banku moolu bayi a la moolu ñaato le, a ye ì la bankoo talaa Banisirayilankoolu teema ka ke ì la keetaafeŋo ti, a ye ì la suwolu ke Banisirayila lasiloolu le la suwolu ti.

⁵⁶Hani wo, ì ye balaŋo tiliŋ Alla Mansa Tallaa la le ka a kotobo, aduŋ ì maŋ a la yaamaroolu muta,

⁵⁷bari ì ye ì koo dii a la le ka badali ko ì mumuñolu. Ì jenketa le komeŋ worotoo.

⁵⁸Ì ye a la kamfaa wulindi le, ka bo niŋ ì la jalaŋ batudulaa tintiŋolu* la. Ì la kuwo ye a kiiliyandi jawuke le, ì la jalaŋ leseriŋolu kamma la.

⁵⁹Tuma meŋ Alla ye ì fokaŋo moyi, a kamfaabaata le, fo a ye i bo Banisirayila to fereŋ.

⁶⁰A ye a koo dii a la Batudulaa la le meŋ be Silo saatewo to, a tarata moolu fee tiriliisoo meŋ kono.

⁶¹A ye a la Kambeŋ Kunewo* duŋ jawoolu bulu le, a la semboo niŋ a la kallankeeyaa* misaaloo.

⁶²A ye a la kamfaa fijoo jindi a fansuŋ moolu kaŋ ne, a ye ì bula ì ye ì faa hawusaroo* la.

⁶³Ì la fondinkewolu banta faa la kele kandoo le kono, ì la sunkutoolu maŋ kee soto, sako futuusiti denkili si laa.

⁶⁴Ì ye ì la piriisoolu* faa hawusaroo la le, ì la furuyaamusoolu maŋ saŋakumboo ke noo.

⁶⁵Bituŋ Maariyo naata wuli komeŋ a bota siinoo le la, komeŋ niŋ kelejawaroo ye wayinoo* miŋ, a ye a maadiyandi.

⁶⁶A ye a jawoolu murundi ì koo la le, ka ì bulandi maloo kono fo fawu.

⁶⁷A ye i bo Yusufa koomalankoolu to le, Efurayimu lasiloo, a maŋ ì tomboŋ.

⁶⁸Bari a ye Yahuuda lasiloo le tomboŋ, Siyoni* Konkoo to, a ye meŋ kanu.

⁶⁹A ye a Batudulaa Senuŋo loo jee le komeŋ saŋ fata jamfariŋolu. A ye a londi le komeŋ bankoo, meŋ te bo la a noo to fo fawu.

⁷⁰A ye a la dookuulaa Dawuda tomboŋ ne, ka bo saajii kanta dulaa to.

⁷¹A ye a bondi saajiyolu kunna le ñiŋ kamma la a si a la tomboŋ moolu topatoo, Yaakuba koomalankoolu ka ke Banisirayilankoolu kantalaa[22] ti.

⁷²Dawuda ye ì topatoo niŋ sondome senuŋo le la, a ye ì ñaatonkayaa kuu, kaatu a ye a noo le.