Read Mandinka Jabuuroolu 79 Bible Online

Jabuuroolu 79 - Mandinka bible

Jabuuroolu 79

¹Asafu la Jabuuroo le mu. Hee Alla, sii koteŋolu le dunta i la bankoo kaŋ i ye meŋ dii ǹ na. Ì ye i Batudulaa Senuŋo kosondi le, ì ye Yerusalaamu ke tumbuŋo ti.

²Ì ye i la dookuulaalu furewolu dii duwoolu le la domoroo ti, ka i la lannamoolu suboo dii wulakono daafeŋolu la.

³Ì ye ì yeloo boŋ Yerusalaamu kono le taariŋ, moo maŋ tu jee meŋ si furewolu baadee.

⁴Ǹ keta ǹ dandanna banku moolu ye jutunna moolu le ti, ì ka ǹ ñaawali ka jele ǹ na.

⁵Hee Yaawe*, janniŋ muŋ tuma le mu? Fo i be tu la kamfaariŋ m̀ fee le fo abadaa? Fo ǹ na kuwo diminnaa be tu la i kono le ko dimbaa?

⁶I la kamfaa jindi sii koteŋolu kaŋ mennu maŋ soŋ i ma, mansamarali bankoolu mennu buka i too kumandi.

⁷Kaatu ì ye Yaakuba koomoo kasaara le, ì ye ǹ na bankoo tumbuŋ.

⁸Kana m̀ mumuñolu la junuboolu muta i kono ntolu kamma. Balafaa ǹ ye silaŋ, ǹ korita le las.

⁹Hee Alla, ǹ na kiisoo sababoo, m̀ maakoyi, fo i too si horoma. Ǹ kiisa, i ye yamfa ǹ na junuboolu la, i too la kuwo kamma la.

¹⁰Muŋ ne be a tinna bantala banku* moolu be a fo la ko, “Ì la Alla lee?” I la dookuulaalu yeloo boŋo juloo joo bantala banku moolu to, ǹ ñaa ye a je.

¹¹Mutamoolu woosiikaŋo moyi. Ka bo niŋ i la sembe baa la, i si moolu tankandi jawoolu ye mennu ke saayaa daa to.

¹²Maariyo, dandanna banku moolu kiliŋ-wo-kiliŋ joo siiñaa woorowula, jutunnayaa kuwolu la, ì ye mennu tiliŋ i la.

¹³Wo le to ntolu, i la saajii koorewo, ǹ si i tentu fo abadaa. Ǹ si tu i jayi la ka taa fo jamaani naalaalu la.