Read Mandinka Jabuuroolu 80 Bible Online

Jabuuroolu 80 - Mandinka bible

Jabuuroolu 80

¹Meŋ be suukuulaa ñaatonkayaa la: A si laa juloo la ì ka a fo meŋ ye ko, “Firoolu.” Asafu la Seedeyaaraŋo le mu. Jabuuroo le mu. Banisirayila Kantalaa,[23] i tuloo tu ǹ to, ite meŋ ka Yusufa koomalankoolu[24] kenkeŋ ko saajii koorewo. Ite meŋ na mansasiiraŋo be kerubu malaayikoolu* teema, i la kallankeeyaa* faramansandi,

²Efurayimu*, Benjamini, aniŋ Manase lasiloolu ye. I niŋ i la semboo ye wuli, i ye naa ǹ kiisa.

³Hee Alla, m̀ murundi firiŋo kono, i ye i ñaa diyaa m̀ fee, fo ǹ si kiisa.

⁴Hee Yaawe* Alihawaa Maariyo*, janniŋ muŋ tuma le i be tara la kamfaariŋ, ka balaŋ i la moolu la duwaa jaabi la?

⁵I ye ñaajiyo le ke ì ye domoroo ti, ì ka ñaajiyo miŋ ne komeŋ jiyo.

⁶I ye ǹ ke ǹ dandanna banku moolu ye fuufuutaa le ti, ǹ jawoolu ka jele ǹ na.

⁷Hee Alla Alihawaa Maariyo, m̀ murundi firiŋo kono, i ye i ñaa diyaa m̀ fee, fo ǹ si kiisa.

⁸I ye wayini* yiri betoo bondi naŋ Misira le, i ye banku moo koteŋolu bayi, i naata a tutu.

⁹I ye kenoo fita a ye le, a ye suloo duŋ, a woyita bankoo kaŋ ka a beŋ.

¹⁰A dubeŋo ye konkoolu muuri le, a buloolu ye sedari* yiri baalu muuri.

¹¹A buloolu biireeta le ka taa fo Baa Baa* maafaŋo la, aniŋ ka taa Yufurati Boloŋo maafaŋo.

¹²Wo to muŋ ne duŋ ye a tinna i ye a sansaŋo boyindi duuma, ka a tinna tambilaalu bee ka a diŋolu woronto?

¹³Wulakono seewoolu ka kirimbaasi a kaŋ ne ka a kuura, wulakono daafeŋolu ka i baluu a la.

¹⁴Hee Alla Alihawaa Maariyo, muru ǹ kaŋ! Duuma juubee ka bo Arijana kono, i ye a je. Ñiŋ yiroo topatoo,

¹⁵i ye meŋ tutu i bulubaa buloo la, ka a londi i faŋo ye ko dinkewo.

¹⁶Jawoolu ye a kuntu duuma le, ì ye dimbaa duŋ a la. Allamaa i kamfaatoo ye ì juubee, i ye ì kasaara.

¹⁷Bari i bulubaa buloo ye tara i la tomboŋ moo koto, wo hadamadiŋo i ye meŋ londi i faŋo ye.

¹⁸Wo to ǹ te ǹ koo dii la i la kotenke. Ǹ na baluwo kutayandi, m̀ be kali i tentu la i too la le.

¹⁹Hee Yaawe Alihawaa Maariyo, m̀ murundi firiŋo kono, i ye i ñaa diyaa m̀ fee, fo ǹ si kiisa.