Read Mandinka Jabuuroolu 85 Bible Online

Jabuuroolu 85 - Mandinka bible

Jabuuroolu 85

¹Meŋ be suukuulaa ñaatonkayaa la: Kora koomalankoolu la Jabuuroo le mu. Yaawe*, i hiinata i la bankoo moolu ye le nuŋ, i ye Yaakuba koomalankoolu murundi firiŋo kono le.

²I ye i la moolu la junuboolu tuutuu le, i yamfata ì la boyidaalu bee la. S

³I ye i la kamfaa daŋ ì kamma le, i ye i la jusukandoo bondi.

⁴Hee Alla, ǹ na Kiisandirilaa, m̀ murundi firiŋo kono kotenke, i ye hiina ǹ ye i la jusuboo la, i ye meŋ ke ǹ kamma.

⁵Fo i be tu la kamfaariŋ ǹ kamma le doroŋ? Fo i la kamfaa be tu la le fo fawu?

⁶Fo i te ǹ na baluwo kutayandi la kotenke, fo ntolu, i la moolu, si seewoo i la keroolu la?

⁷Hee Yaawe, i la kanu bambaloo yitandi ǹ na, i ye ǹ kiisa.

⁸Silaŋ, m be n lamoyi la Yaawe Alla la kumakaŋo le la, bayiri a be kayira kuwo le fo la a la moolu ye, a la moo tilindiŋolu, wo to ì kana ì la tooleeyaa maañaa seyinkaŋ.

⁹A be koyiriŋ ne ko, a be pareeriŋ ne ka moolu kiisa mennu ye a kuliyaa, fo horomoo si tara a ye, ǹ na bankoo kaŋ.

¹⁰Alla la kanu bambaloo niŋ tooñaa be beŋ na le, tiliŋo niŋ kayiroo ye ñoo sumbu.

¹¹Hadamadiŋolu la foroyaa be wuli la duniyaa kono le, bituŋ Alla niŋ a la tiliŋo ye juubeeroo ke ka bo Arijana kono.

¹²Tooñaa la, Yaawe be kuu kendoo le dii la, aduŋ ǹ na bankoo be siimaŋo wuluu la le.

¹³Tiliŋo moomaa be tara la a ñaatiliŋo la le, ka siloo parendi a ye.