Read Mandinka Jabuuroolu 9 Bible Online

Jabuuroolu 9 - Mandinka bible

Jabuuroolu 9

¹Meŋ be suukuulaa ñaatonkayaa la: A si laa juloo la ì ka a fo meŋ ye ko, “Dinkee la Saayaa.” Dawuda la Jabuuroo le mu. M be ite Yaawe* tentu la niŋ n sondomoo bee le la. M be kaawakuwolu bee le seyinkaŋ na, i ye mennu ke.

²M be jusulaa la le, aniŋ ka seewoo i la kuwo la. M be suukuwo laa la le ka ite Mansa Tallaa jayi i too la.

³N jawoolu ka muru ì koo la le. Ì ka taki le ì ye kasaara i ñaatiliŋo la.

⁴Kaatu i loota n na boloo ye le, i ye n na makatoo bayi. I ye kiitiyo teyi n ye tiliŋo le la ka bo i la mansasiiraŋo kaŋ.

⁵I ye bantala banku* moolu jalayi le, i ye moo kuruŋolu kasaara. I ye ì toolu buruka duniyaa kono le fo fawu.

⁶I ye ǹ jawoolu turutumbuŋ ne, i ye ì la saatewolu buruka, ì la kuwo keta ñinataa ti fereŋ.

⁷Yaawe be tu la siiriŋ a la mansasiiraŋo kaŋ ne fo abadaa. A ye a la mansasiiraŋo londi le ka kiitiyo teyi.

⁸Ate Alla le ka duniyaa moolu kiitindi niŋ tiliŋo la, a ka moolu kiitindi niŋ tooñaa le la.

⁹Yaawe le mu moo toorariŋolu tuukuraŋo ti, a mu ì ye tankadulaa le ti mantooroo waatoo la.

¹⁰Moolu mennu ye ite loŋ famfaŋ, wolu be ì jikoo loo la i kaŋ ne. Yaawe, ite buka i koo dii moolu la mennu ka i ñini.

¹¹Ali suukuwo laa ka Yaawe jayi, meŋ na mansasiiraŋo be Siyoni*. Ali a seyinkaŋ duniyaa moolu ye a ye kuwolu mennu ke.

¹²Ate meŋ ka moofaa juloo joo, a ka moo toorariŋolu hati le. A buka ñina moolu la kumboo la, ì ka mennu toorandi.

¹³Hee Yaawe, balafaa n ye. A juubee mennu ye n koŋ, ì ye n toorandi ñaameŋ, ite meŋ ka m bondi saayaa daa to,

¹⁴ñiŋ kamma la n si loo saatee ñiimaa Siyoni dundaŋ daalu* to, ka kuwolu seyinkaŋ moolu ye, n ka i tentu mennu la, ka seewoo, kaatu i ye n kiisa le.

¹⁵Bantala banku moolu tuta jamfaadinkoo kono le, ì faŋolu ye meŋ siŋ. Ì ye jaloo meŋ laa, a ye ì faŋolu le muta.

¹⁶Yaawe ye a yitandi ì la le ate mu meŋ ti, kaatu a ye kiitindiroo ke niŋ tiliŋo le la. Moo kuruŋolu bulata ì faŋolu la feere kuruŋolu le kono. H[3] S

¹⁷Moo kuruŋolu be taa kaburoo kono le, banku koteŋ moolu mennu bee ñinata Alla la.

¹⁸Bari Alla te ñina la moo bataariŋolu la, fentaŋolu jikoo te buruka la abadaa.

¹⁹Hee Yaawe, wuli, kana soŋ hadamadiŋolu ye kututeyi. Bantala banku moolu kiitindi i ñaatiliŋo la.

²⁰Yaawe, silaŋo dundi ì la. Ì londi ñiŋ na ko, ì mu hadamadiŋolu doroŋ ne ti. S