Read Mandinka Jabuuroolu 90 Bible Online

Jabuuroolu 90 - Mandinka bible

Jabuuroolu 90

¹Alla la moo Musa la Jabuuroo. Maariyo, ntolu tankadulaa be ite le fee, jamaanoolu bee la.

²Janniŋ i ka konkoolu fintindi, waraŋ ka bankoo daa, aniŋ ka duniyaa sotondi, ite mu Alla le ti kabiriŋ, aduŋ i be ke la Alla le ti fo abadaa.

³I la yaamaroo kaŋ hadamadiŋolu ka muru le ka ke bankumunkoo ti. I ka ì yelemandi wo le ti, ì bota meŋ bala.

⁴Sanji wuli kiliŋ ka munta ite fee le ko tili kiliŋ, a ka munta suutoo waati sutuŋ.

⁵I ka hadamadiŋolu koora le, i ye ì tambindi komeŋ siiboo. Ì ka munta le ñaamoo meŋ falinta soomandaa,

⁶a ye faliŋ soomandaa ka firoolu bondi, bituŋ wulaaroo a ye noro, ka jaa.

⁷I la kamfaa niŋ i la jusukandoo ǹ kamma, wo le ka ǹ kijabo, a ye ǹ kasaara.

⁸I ye ǹ na junube kuwolu landi i ñaatiliŋo la le, ǹ na kullookono junuboolu be i ye kenebaa to le.

⁹I la kamfaa le ka ǹ na baluu luŋolu baŋ, aduŋ ǹ siyo ka baŋ ne komeŋ ŋuntaŋo.

¹⁰Ǹ siyo daŋo mu sanji taŋ woorowula le ti, waraŋ niŋ m̀ bambanta, sanji taŋ seyi, hani wo, ì bee mu bataa niŋ mantooroo le ti. Kataba kiliŋ ì si baŋ, ŋà yeemaŋ.

¹¹Jumaa le ye i la kamfaa la waroo daŋo loŋ? I la kamfaa warata baake le, jumaa le si a loŋ noo? I ñaasilaŋo ñanta wara la ǹ kaŋ wo le ñaama.

¹²Wo to ǹ karandi ka ǹ na baluwo la sutiyaa loŋ, fo i la ñaameŋo si tara ǹ sondomoo kono.

¹³Hee Yaawe*, i la kamfaa be baŋ na muŋ tuma le? I kooma fele, i ye balafaa ǹ ye, ntolu mu i la dookuulaalu le ti.

¹⁴I la kanu bambaloo yitandi ǹ na fanoo la ke tumoo la, fo ǹ si seewoo ka suukuwo laa ǹ na baluu tiloolu bee la.

¹⁵Ǹ na seewoo warandi komeŋ i ye ǹ na niikuyaa warandi ñaameŋ, sanji jamaa, biriŋ m̀ be mantooroo kono.

¹⁶I la kaawakuwolu yitandi ntolu la, i la dookuulaalu, aduŋ i si i la kallankeeyaa* yitandi ǹ koomalankoolu fanaa la.

¹⁷M̀ Maarii Alla, Allamaa i la hiinoo ye tara m̀ fee, aduŋ i si ǹ na bulu la dookuwo bee ke ǹ ye ñaatotaa ti. Dukaree, ǹ na kata kuwolu bee ke ǹ ye ñaatotaa ti.