Read Mandinka Jabuuroolu 92 Bible Online

Jabuuroolu 92 - Mandinka bible

Jabuuroolu 92

¹Jabuuroo le mu. Loobula Luŋ suukuwo. Kuu kende le mu, ka ite Yaawe* tentu, ka suukuwo laa ka ite Alla Mansa Tallaa jayi i too la.

²Kuu kende le mu, ka i la kanu bambaloo kankulaa soomandaa-wo-soomandaa, aniŋ i la tiliŋo suuto-wo-suuto,

³ka a ke niŋ kooraa la, aniŋ suusaa, ka a laa niŋ kontiŋ julu diimaa la.

⁴Kooni Yaawe, i la kekuwolu ye n jusulaa le. N ka suukuwo laa seewoo kono le, ñiŋ kamma la i ye kuu baalu mennu ke.

⁵Hee Yaawe, i la kekuwolu warata baake le, i la miiroolu diinonta famfaŋ.

⁶Toolewo te loŋ ke la, aduŋ hakilintaŋo te fahaamuru ke la ko:

⁷Moo kuruŋolu ka jambandi le komeŋ ñaamoo, kuu jawu kelaalu ka firiŋ, hani wo ì be kasaara la le fereŋ.

⁸Ite Yaawe le be feŋo bee ye santo fo abadaa.

⁹Hee Yaawe, a fele, i jawoolu wo, a fele, i jawoolu be kasaara la le. Kuu jawu kelaalu bee le be janjaŋ na.

¹⁰Bari i ye nte semboo warandi le komeŋ tuuraa. I ye tulu senuŋo* le boŋ n kaŋ ka n ke i taa ti.

¹¹N ñaa ye n jawoolu la boyoo je le, ŋa wo konnantee jawoolu woosiikaŋo moyi le.

¹²Moo tilindiŋolu be yiriwaa la le komeŋ teŋ suŋo, ì ye faliŋ komeŋ Libanooni sedari* yiroolu.

¹³Ì be tara la tuturiŋ Yaawe batudulaa le kono, ka yiriwaa ǹ na Alla la luwo to.

¹⁴Hani ì kotoo waatoo la ì ka diŋ ne, ì ka tara faariŋ yiriwaa niŋ kereyaa la.

¹⁵Wo ye ñiŋ ne yitandi ko, Yaawe tilinta le. Ate le mu n na semberaŋ beroo ti, aduŋ jenkoo te a kono.