Read Mandinka Jabuuroolu 95 Bible Online

Jabuuroolu 95 - Mandinka bible

Jabuuroolu 95

¹Ali naa ŋà suukuwo laa Yaawe* ye, ali ŋà suukuu a ye ǹ kaŋo bee la, seewoo kamma la. Yaawe le mu konko bere baa ti, ǹ na tankadulaa, meŋ ka ǹ tankandi.

²Ali naa ŋà taa Yaawe ñaatiliŋo la ǹ niŋ tenturoo, ka suukuwo laa seewoo kono.

³Kaatu Yaawe warata le, aduŋ ate le mu Mansa baa ti, meŋ warata alloolu bee ti.

⁴Yaawe le marata duniyaa duumoo daŋo bee ma, konkoolu santo daŋo bee fanaa be ate le bulu.

⁵A taa le mu fankaasoo ti, kaatu ate le ye a daa, aniŋ bankoo, a buloo ye meŋ daa.

⁶Ali naa ŋà Yaawe batu, ŋà jimi duuma ka sujudi a ye, ǹ Daamansoo.

⁷Kaatu ate le mu ǹ na Alla ti, ntolu mu a la moolu le ti, a ka mennu topatoo, a la saajii koorewolu, a ka mennu kanta. Ali i lamoyi a kaŋo la bii, meŋ ko,

⁸“Ali kana ali sondomoolu jandi komeŋ ali la alifaa foloolu, mennu balanta m ma Meriba, waatoo meŋ ì be keñewuloo* kono Masa.

⁹Ali mumuñolu ye n na kaŋo soosoo, ì ye n na muñoo daŋo kotobo, ì ye n na baara kuu baalu je ñaa-wo-ñaa.

¹⁰N tarata ñewundiŋ ì la le fo sanji taŋ naani, aduŋ n kumata ko, ‘Ñiŋ moolu sondomoo le ye ì filindi, ì jututa n na kuwolu la.’

¹¹Bituŋ n kamfaariŋo kalita ì ye ko, ì te futa la n na dahaa dulaa to.”