Read Mandinka Jabuuroolu 96 Bible Online

Jabuuroolu 96 - Mandinka bible

Jabuuroolu 96

¹Duniyaa moolu, ali suukuu kutoo laa Yaawe* ye, ali suukuwo laa Yaawe ye, duniyaa siyolu bee.

²Ali suukuwo laa Yaawe ye ka a jayi a too la. Ali kankulaaroo ke luŋ-wo-luŋ, a ye kiisandiroo ke ñaameŋ.

³Ali a la semboo niŋ waroo kankulaa bankoolu bee kaŋ, aniŋ a la kaawakuu baalu duniyaa siyolu bee kono.

⁴Kaatu Yaawe warata le, aduŋ a ñanta tentu la le famfaŋ, ate le silaŋñaa ñanta wara la alloolu bee ti.

⁵Kaatu moolu ye feŋolu mennu muta Alla ti, ì mu jalaŋ kenseŋolu le ti. Bari Yaawe le ye saŋ fatoolu daa.

⁶Horomoo niŋ mansayaa waroo ye a murubeŋ ne, semboo niŋ ñiiñaa le be faariŋ a la batudulaa senuŋo kono.

⁷Duniyaa siyolu, ali Yaawe jayi a la waroo kaŋ. Ali a tentu a la semboo kaŋ.

⁸Ali Yaawe too la waroo niŋ a la semboo fo, ka horomoo dii a la. Ali ali la sadaalu* samba naŋ, ali naa a batudulaa luwo to.

⁹Ali Yaawe batu a la seneyaa ñiimaa kono, duniyaa moolu bee, ali jarajara a ñaatiliŋo la.

¹⁰Ali a kankulaa duniyaa moolu kono ko, “Yaawe mu Mansa le ti. A ye duniyaa londi le a bambanta, a te wutu la a noo to. A be moolu kiitindi la tiliŋo niŋ tooñaa le la.”

¹¹Saŋ fatoolu ye seewoo, bankoo ye kontaani. Fankaasoo ye bumbuŋ, aniŋ feŋolu mennu bee be a kono.

¹²Kunkoolu ye seewoo, ì niŋ ì fiifeŋolu. Wulakono yiroolu be wuuri la le, seewoo kamma la,

¹³ka suukuwo laa Yaawe ye, kaatu a be naa le, a be naa ka duniyaa kiitindi. A be duniyaa moolu kiitindi la tiliŋo niŋ tooñaa le la.